“Tapno Maitandudo ti Nagan ni Jehova”

ITI sangalubongan, ti magasin a Ti Pagwanawanan ken ti kaduana nga Agriingkayo!, ket maipatpateg gapu kadagiti naespirituan ken makaisuro a linaonda. Kas pammaneknek iti dayta, kastoy ti insurat itay nabiit ti maysa nga agbasbasa idiay Francia:

“Maysaak nga agtutubo a babai, a tubo manipud Africa, nga addaan iti nababa nga adal. Iti dipay nabayag, nangrugiak nga agbasa kadagiti magasinyo. Naipategko ti panagbasa gapu kadagiti makapainteres a suheto. Babaen dagiti magasinyo, naparang-ayko ti bokabulariok ken makapagsuratak nga awan ti adu a kamali.

“Agasem ta talantanenyo ti amin a suheto maipapan iti tao, planeta, ken iti Namarsua. Naglaka a maawatan dagitoy nga artikulo isu a kanayon a magagaran ti tao nga agbasa. Awan ti kas kadagiti magasinyo a maisurona ti amin a kita ti tao.

“Pagsiddaawak met ta saan a nakomersialan ti panggep dagitoy no di ket tapno maitandudo ti nagan ni Jehova. Ammok nga adda kadakayo ti anamongna, ket agyamanak kadakayo. Itultuloyyo koma ti dumawat iti bileg manipud iti Namarsua tapno makaisurokayo.”

Iti agdama, ar-aramiden dagiti Saksi ni Jehova ti trabahoda a panangisuro iti Biblia iti 235 a pagilian. Ti Pagwanawanan ket maipabpablaak iti 148 a lenguahe ken ti Agriingkayo! iti 87 a lenguahe. Maimalmaldit dagitoy a pagbasaan saan a tapno mangpadayaw iti siasinoman a tao. Dagiti naibatay-Biblia a balakad ken napabaro nga impormasion a linaon dagitoy ket nadisenio a mangpadayaw iti Namarsua, a mangibagbaga: “Siak, ni Jehova, . . . Daydiay mangisursuro kenka tapno magunggonaam ti bagim.” (Isaias 48:17) Sapay koma ta regular a basaem ti Nasantuan a Kasuratan agraman dagitoy a katulongan iti panangadal iti Biblia yantangay agpaayda a pagimbagam.