‘Maragsakanak iti Pannakasanayko’

NAPAMUTTALENG ti agtutubo a ni Kazuna idi isingasing ti mannursurona ti pannakisalipna iti panagpalawag iti Ingles. Silulukat ti pasalip kadagiti amin a haiskul iti dakkel a makin-amianan nga isla ti Japan, ti Hokkaido, ngem ita laeng a mangibaon ti eskuelaanna iti estudiante maipaay iti kasta a pasalip. Iti aldaw ti pasalip, madanagan ni Kazuna agsipud ta 50 nga estudiante ti kasalisalna. Ad-adda a nagdanag idi makitana nga Ingles ti katutubo a pagsasao ti dua kadagiti ukom.

Naiwaragawag dagiti nangabak, mangrugi iti kababaan ti premiona. Saan a mamati ni Kazuna idi naawagan ti naganna kamaudiananna. Masmasdaaw a nagkinnitada iti katugawna a mannursurona, sa napan iti entablado ket inawatna ti tropeo kas nangabak iti umuna a premio!

“Naaramidak daytoy gapu iti panangsanay nga ipapaay ti organisasion ni Jehova babaen ti Teokratiko nga Eskuelaan ti Panagministro,” inlawlawag ti maragsakan a ni Kazuna. “Maragsakanak unay gapu iti dayta a pannakasanayko.” Dayta a nadakamat nga eskuelaan, a pakipaspasetan ni Kazuna sipud kinaganusna, ket maysa kadagiti gimong ti kongregasion dagiti Saksi ni Jehova. Kas panagsagana iti pasalip, inadal a naimbag ni Kazuna ti panangusar iti mikropono, nabara ken entusiastiko a panagsao, panagkompas, panangkita kadagiti agdengdengngeg, ken dadduma pay a suheto a naisuro iti Teokratiko nga Eskuelaan ti Panagministro.

Awisendakayo a mangpaliiw iti daytoy nga eskuelaan, a linawas a maangay iti Kingdom Hall dagiti Saksi ni Jehova iti lugaryo. Personal nga ammuenyo no kasano a magunggonaan agpadpada dagiti agtutubo ken adulto. Mabalin a tumabuno ti siasinoman. Kasaritayo dagiti Saksi ni Jehova iti lugaryo no kayatyo nga ammuen ti kanayonan nga impormasion maipapan iti kasta nga eskuelaan a kaasitgan iti lugaryo.