Maysa a Pagteng a Laglagipen

ANIA a pagteng dayta? Isu ti ipapatay ti maysa a tao a pimmusay dandani 2,000 a tawenen ti napalabas. “Isukok ti kararuak, tapno maawatko manen dayta,” kinunana. “Awan ti tao a nangikkat iti dayta manipud kaniak, no di ket isukok dayta iti bukodko a nakem.” (Juan 10:17, 18) Dayta a tao isu ni Jesu-Kristo.

Imbilin ni Jesus kadagiti adalanna a rambakanda ti Pananglaglagip iti sakripisio nga ipapatayna. Ti okasion ket naawagan met “ti pangrabii ti Apo.” (1 Corinto 11:20) Ti Memorial nga inyusuat ni Jesus kas panglaglagip iti ipapatayna ket rambakan dagiti Saksi ni Jehova ken dagiti gagayyemda inton Huebes, Marso 24, 2005, kalpasan ti ilelennek ti init.

Maysa a palawag a naibatay iti Biblia ti mangilawlawag iti kaipapanan ti awan lebadurana a tinapay ken ti nalabaga nga arak a mausar iti dayta nga okasion. (Mateo 26:26-28) Iti palawag, masungbatan met dagiti saludsod a kas kadagitoy: Kasano kasansan a nasken a rambakan dagiti Kristiano daytoy nga okasion? Siasinoda ti maiparbeng a makipaset kadagiti emblema a tinapay ken arak? Siasino ti magunggonaan iti ipapatay ni Jesus? Daytoy a nagpateg a pananglaglagip tulonganna ti amin a mangipateg iti panggep ti biag ken ipapatay ni Jesus.

Sibabara nga abrasaendakayo iti Pananglaglagip iti ipapatay ni Jesus. Damagenyo kadagiti Saksi ni Jehova ti pakaangayan ken oras ti okasion.