“Naidadanes Gapu iti Pammatina”

ITI maysa a parke iti ili ti Cernobbio iti makin-amianan nga Italia, maysa a lugar ti nailatang para iti pakalaglagipan dagiti biktima ti panaglabsing iti kalintegan ti tao. Maysa kadagiti plake a makita iti lugar a pakalaglagipan ket naidedikar ken ni Narciso Riet. Ni Riet ket naipasngay idiay Alemania iti Italiano a nagannak ken nagbalin a maysa kadagiti Saksi ni Jehova idi dekada 1930. Bayat ti rehimen ni Hitler, naidadanes dagiti Saksi ni Jehova gapu ta pinilida ti agdayaw iti pudno a Dios, ni Jehova, imbes a ken ni Hitler.

Idi naammuan dagiti Gestapo a maysa ni Riet kadagidiay mangip-ipan kadagiti kopia Ti Pagwanawanan kadagiti kampo konsentrasion, nagkamang ni Riet idiay Cernobbio. Sadiay, nakiddaw nga ipatarusna Ti Pagwanawanan iti Italiano ken iwarasna dayta kadagiti kapammatianna kadagiti asideg a lugar. Ngem idi agangay, naduktalan dagiti naregta nga aktibidadna. Maysa nga opisial ti SS ken dagiti tattaona ti nangraut iti pagtaengan ni Riet, inarestoda, ken innalada ti dua a Biblia ken sumagmamano a surat kas pammaneknek nga isu ket “kriminal”! Napaawid ni Riet idiay Alemania, naibalud iti kampo konsentrasion ti Dachau, ken napapatay di nagbayag sakbay ti panagpatingga ti Gubat Sangalubongan II. “Naidadanes gapu iti pammatina,” kuna ti plake ti Cernobbio.

Ti pammati ni Narciso Riet ken ti ginasgasut a dadduma pay a Saksi a nagbalin a biktima ti panangidadanes ti Nazi paregtaenna dagiti Kristiano ita tapno agtalinaedda a matalek ken ni Jehova, ti kakaisuna a Persona iti uniberso a maikari a pagdayawanda. (Apocalipsis 4:11) Kinuna ni Jesus: “Naragsak dagidiay maidaddadanes maigapu iti kinalinteg.” Laglagipen ti Dios dagiti aramidda ken bendisionanna ida gapu iti kinaturedda.​—Mateo 5:10; Hebreo 6:10.