‘Nabaknangka Kadi iti Imatang ti Dios’?

KADAGITI adu a mamagpanunot nga ilustrasion ni Jesu-Kristo, maysa kadagita ti maipapan iti nabaknang nga agtagikua iti daga. Iti panagreggetna a maaddaan iti natalged a masanguanan, implanona ti mangibangon kadagiti daddadakkel a kamalig. Ngem iti ilustrasion ni Jesus, daytoy a nabaknang ket naawagan a “di nainkalintegan.” (Lucas 12:16-21) Natukoy pay a “maag” iti sumagmamano a patarus ti Biblia. Apay a kasta laengen ti pannakababalawna?

Nalawag, daytoy a nabaknang a tao saanna nga inkabilangan ti Dios kadagiti planona; saanna man la a pinadayawan ti Dios iti kinabunga ti dagana. (Mateo 5:45) Imbes a kasta, impannakkelna: “Kararua, addaanka iti adu a naimbag a banag a naidulin maipaay iti adu a tawen; agnam-ayka, manganka, uminumka, agragragsakka.” Wen, pinanunotna a dagiti bunga ti panagreggetna ket agserbi kas “mangsalaknib a pader.”​—Proverbio 18:11.

Iti panagballaagna maibusor iti kasta a kinatangsit, insurat ni adalan a Santiago: “Umaykayo, ita, dakayo nga agkuna: ‘Ita nga aldaw wenno inton bigat agbaniagakamto nga agturong iti daytoy a siudad ket mangbusboskamto iti makatawen sadiay, ket agnegosiokaminto ken agganansiakami,’ idinto ta saanyo nga ammo no anianto ti biagyo inton bigat. Ta maysakayo nga angep nga agparang iti apagbiit ket kalpasanna agpukaw.”​—Santiago 4:13, 14.

Maitunos kadagita a sasao, naibaga iti daytoy a nabaknang a tao iti ilustrasion ni Jesus: “Maysa a di nainkalintegan, iti daytoy a rabii kalikagumanda kenka ti kararuam. Asino, ngarud, ti agtagikua iti bambanag nga impempenmo?” Kas iti agpukaw nga angep, agpukaw wenno matay ti nabaknang a tao sakbay a makitana ti kaitungpalan dagiti arapaapna. Matarusantayo kadi ti leksion? Kinuna ni Jesus: “Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.” ‘Nabaknangka kadi iti imatang ti Dios’?