Iranranudda ti Naimbag a Damag Kadagiti Tuleng

“IPAAYDA ti naespirituan a kasapulanyo!” Kasta ti nabiit pay a kinuna ti direktor ti maysa a pasilidad a pagnanaedan dagiti lallakay ken babbaket idiay Navalcarnero, Madrid, Espania, maipapan kadagiti Saksi ni Jehova a bimmisita iti pasilidad. Apay a naibagana dayta?

Tuleng ti dadduma nga agnanaed iti pasilidad ti Rosas del Camino. Ngem yantangay inkagumaan dagiti Saksi ti makasursuro iti Spanish Sign Language, kabaelanda ti makikomunikar kadagitoy residente. Ti direktor pinadayawanna dagiti Saksi gapu iti libre a panangisuroda kadagiti naespirituan a bambanag kadagidiay agkasapulan. Napaliiwna a nasayaat ti epektona kadagiti residente ti pannakaisuro kadakuada ti naimbag a damag ti Pagarian. Dagiti met residente​—nangruna dagidiay di makangngeg wenno di makakita​—tagipatgenda met unay ti panagbisita dagiti Saksi.

Ni Eulogio, a maysa kadagiti residente a bulsek ken tuleng, makipagad-adalen iti Biblia kadagiti Saksi ni Jehova. Naminsan, bayat ti panagadal, immasideg ti maysa a lakay ket intedna iti Saksi ti maysa a daniw a pinutar dagiti residente kas ebkas ti panagyamanda. Ti daniw ket napauluan “Ti Maysa a Saksi.” Kuna ti paset ti daniw: “Naimbag ken disiplinado ti panagbiagda, ken mangyeg iti rag-o ti sirib a gunggun-odenda manipud ken Jehova. Masansan nga agsarungkarda kadagiti binalaybalay agsipud ta agtalekda ken Jehova.”

Daytoy a mismo a panagtalek ken ni Jehova ti nangtignay iti adu a Saksi iti intero a lubong tapno agadalda iti sign language nga us-usaren dagiti tuleng iti pagilianda. Babaen dayta, mairanudda kadagiti tuleng ken umel ti makaparegta a mensahe ti namnama manipud iti Biblia.