Naidadanes sa Naabrasa

SUMAGMAMANO a tawenen ti napalabas, da Santiago ken ni baketna a Lourdes ket immakar idiay nakapimpintas nga ili ti Huillcapata, Peru, tapno iranudda sadiay ti mangted-namnama a mensahe ti Biblia. Ngem di nagbayag, simmangpet ti maysa a padi a taga-Cuzco ket inummongna dagiti umili. Binallaaganna ida a gapu iti kaadda dagiti Saksi ni Jehova, adda umapay a makapapatay a saplit ken nakaro a panagtinnag ti niebe a pakatayan dagiti baka ken pakadadaelan dagiti mulmulada.

Adu ti naimpluensiaan iti daytoy a “padto,” ket iti nasurok a kagudua a tawen, awan uray maysa kadagiti umili ti nakipagadal iti Biblia kada Santiago ken Lourdes. Maysa nga opisial ti ili, ti teniente gobernador nga agnagan iti Miguel, ti nangkamat ken nangubor kada Santiago ken Lourdes. Ngem tinaginayonda ti kinamannakikappiada ken ti Nakristianuan a kababalinda.

Idi agangay, sumagmamano nga umili ti nakipagadal iti Biblia. Uray ni Miguel nagbalbaliw met ti kababalinna. Nangrugi a makipagadal ken ni Santiago, saanen nga agbarbartek ken nagbalinen a mannakikappia. Kamaudiananna, nagbalin a Saksi ni Miguel, ti asawana, ken ti dua kadagiti annakna a babbai.

Ita, addan narang-ay a kongregasion dagiti Saksi ni Jehova iti daytoy nga ili. Maragsakan ni Miguel ta saan a naipunta ti kaaduan kadagiti bato nga impuruakna kada Santiago ken Lourdes. Agyamyaman pay iti nagsayaat nga ulidan ti kinamannakikappia dagiti agassawa.

[Ladawan iti panid 32]

Ti kinamannakikappia da Santiago ken Lourdes (ngato) ti namagbalbaliw ken ni Miguel (kannawan)