Salsaludsod Dagiti Agbasbasa
Kunaen ti Salmo 102:26 a ti daga ken ti langit “mapukawdanto.” Kayat kadi a sawen dayta a madadaelto ti planeta a Daga?
Iti kararagna ken Jehova, kinuna ti salmista: “Iti nabayagen a tiempo insaadmo dagiti pamuon ti mismo a daga, ket ti langlangit isuda ti aramid dagita imam. Isuda mapukawdanto, ngem sika agtalinaedkanto; ket kas iti maysa a kawes isuda amin marunotdanto. Kas iti pagan-anay sukatamto ida, ket turposendanto ti batangda.” (Salmo 102:25, 26) Ipamatmat ti konteksto a dagitoy a bersikulo saanda a tuktukoyen ti pannakadadael ti daga no di ket ti kinaagnanayon ti Dios. Ipakitana met no apay a makaliwliwa kadagiti adipen ti Dios dayta a napateg a kinapudno.
Iti rugina, inladawan ti salmista ti panagrigatna, nalabit bayat ti pannakaidestierona idiay Babilonia. Insennaayna a ti biagna ket apagbiit a “kas iti asuk.” Dagiti tulangna “bumegbeggang a kas iti pugon” gapu iti nakaro a pannakaparigatna. Gapu iti pannakapaksuyna, nariknana nga isu ket ‘nagango a kas iti mulmula laeng,’ ken agmaymaysa a “kas iti tumatayab a naiputputong iti rabaw ti atep.” Napukaw ti ganasna a mangan gapu kadagiti rigat a sagsagabaenna, ken napno iti leddaang dagiti al-aldawna. (Salmo 102:3-11) Nupay kasta, saan a napukaw ti namnama ti salmista. Apay? Gapu iti inkari ni Jehova nga aramidenna iti Sion, wenno Jerusalem.
Nupay nadadael ti Sion, inkari ni Jehova a mabangonto manen. (Isaias 66:8) Sitatalek ngarud a kinuna ti salmista ken ni Jehova: “Kaasiamto ti Sion, ta panawenen ti panangparabur kenkuana, ta dimtengen ti naituding a tiempo. Ta ni Jehova sigurado a bangonennanto ti Sion.” (Salmo 102:13, 16) Kalpasanna, sinublian ti salmista ti maipapan iti panagsagsagabana. No anagen, ibagbagana a no mabalinan ni Jehova a bangonen manen ti nalangalang a Jerusalem, sigurado ngarud a kabaelanna met nga alawen ti salmista iti nakaay-ay-ay a kasasaadna. (Salmo 102:17, 20, 23) Ken adda sabali pay a nakatignayan ti salmista nga agtalek a naan-anay ken ni Jehova. Ania dayta? Ti kinapudno a ti Dios ket agnanayon.
Agnanayon nga adda ni Jehova, saan a kas iti salmista nga ababa laeng ti biagna. Kinunana ken Jehova: “Dagiti tawenmo aginggada kadagiti amin a kaputotan.” (Salmo 102:24) Sana innayon: “Iti nabayagen a tiempo insaadmo dagiti pamuon ti mismo a daga, ket ti langlangit isuda ti aramid dagita imam.”—Salmo 102:25.
Kaskasdi, uray ti kinaunday ti kaadda ti daga ken ti langit dina maartapan ti kinaagnanayon ni Jehova. Kinuna pay ti salmista: “Isuda [ti langit ken daga] mapukawdanto, ngem sika agtalinaedkanto.” (Salmo 102:26) Mabalin a madadael ti pisikal a daga ken langit. Pudno, adda dagiti teksto a nangdakamatan ni Jehova nga agtalinaed nga agnanayon ti daga ken ti langit. (Salmo 119:90; Eclesiastes 1:4) Ngem mabalin a madadael dagita no dayta ti panggep ti Dios. Iti kasumbangirna, saan a matay ti Dios. ‘Agtaltalinaed iti agnanayon’ dagiti pisikal a parsua gapu laeng iti panangtaginayon ti Dios kadagita. (Salmo 148:6) No saan a tagtaginayonen ni Jehova dagiti pisikal a parsua, inton agangay “kas iti maysa a kawes isuda amin marunotdanto.” (Salmo 102:26) No kasano nga at-atiddog ti biag ti tao ngem iti kawesna, kasta met ni Jehova, sibibiag latta uray no madadael ti sangaparsuaan—no dayta ti pagayatanna. Ngem kas nadakamat iti dadduma a teksto, pagaammotayo a saan a kasta ti panggepna. Patalgedan kadatayo ti Sao ti Dios a pagtalinaeden ni Jehova iti agnanayon ti literal a daga ken ti langit.—Salmo 104:5.
Makaliwliwa a maammuan a kanayon a tungpalen ni Jehova ti amin a karina. Aniaman dagiti pakaipasanguantayo a suot, no la ket ta umararawtayo kenkuana, makapagtalektayo a “sigurado a bumaw-ingto iti kararag dagidiay nauksoban iti isuamin, ket saanna nga umsien ti kararagda.” (Salmo 102:17) Wen, ti suporta ni Jehova nga impasigurado kadatayo ti Salmo 102 ket adayo a natibtibker ngem iti mismo a daga a pagtaktakderantayo.