Kaslaka Kadi iti Kayo a Lagani Auna?

ITI maysa a purok iti away ti Port Moresby, Papua New Guinea, dua a ministro ti agaw-awid kalpasan ti panangasabada. Bayat ti pannagnada, nakakitada iti maysa a napintas a kayo. “Lagani auna dayta!” kinuna ti laklakay. Kimmita iti ub-ubing, ket intuloyna: “Dayta a nagan kaipapananna ‘tinawen a kayo.’ Saan a kas iti adu a dadduma a kayo iti tropiko, tinawen nga agregreg ti amin a bulongna ket kasla natayen. Ngem no matutudo, agbulong, agsabong, ket agparang manen ti pintasna.”

Maysa a leksion ti masursuro iti lagani auna, wenno kayo a kabaliero (fire tree), kas gagangay nga awag iti dayta. Sigun iti sumagmamano nga eksperto, naibilang dayta kas maysa kadagiti lima a kapintasan nga agsabsabong a kayo iti lubong. Nupay maawanan kadagiti sabong ken bulong bayat ti kalgaw, agurnong daytoy a kayo iti suplay ti danum. Natibker dagiti ramutna ken agtubo dagita iti nagbaetan dagiti batbato iti uneg ti daga. Gapuna, natibker a nakakapet daytoy a kayo uray napigsa ti angin. Iti ababa a pannao, makapagbiag dayta uray kadagiti narigat a kasasaad.

Mabalin a maipasangotayo met kadagiti kasasaad a mangsubok iti kalidad ti pammatitayo. Ania ti tumulong kadatayo nga agibtur? Kas iti lagani auna, mabalintayo a sagepsepen ken urnongen ti mangted-biag a danum ti Sao ti Dios. Rumbeng a kumpettayo met a siiirut iti ‘batotayo,’ ni Jehova, ken iti organisasionna. (2 Samuel 22:3) Wen, ti lagani auna ket maysa a nagsayaat a palagip nga uray iti narigat a kasasaad, mataginayontayo ti naespirituan a pigsa ken kinangayedtayo no aprobetsarentayo dagiti probision nga ipapaay ni Jehova. Babaen ti panangaramid iti dayta, ‘tawidentayo dagiti inkarina’ agraman ti biag nga agnanayon.​—Hebreo 6:12; Apocalipsis 21:4.