“Ania ti Kaipapanan ti Lila a Trianggulo?”
“ADDA naawatko a kopia Ti Pagwanawanan manipud iti maysa a Saksi ni Jehova, sumagmamano nga aldawen ti napalabas,” insurat ti maysa nga empleado iti ministry of justice idiay Seoul, Republic of Korea. Intuloyna: “Iti panangbasbasak iti dayta, adda sumagmamano a banag a naammuak maipapan iti pannakaidadanes dagiti Saksi ni Jehova iti sidong ti rehimen dagiti Nazi ken Komunista. Ngem adda saludsodko. Iti akkub dayta a magasin, nailadawan dagiti Saksi ni Jehova nga addaan iti nakabaliktad a lila a trianggulo iti makannigid a paset dagiti kawesda. Ania ti kaipapanan ti lila a trianggulo?”
Iti sidong ti turay dagiti Nazi idiay Alemania, nagkedked dagiti Saksi ni Jehova nga agsaludo ken ni Hitler, ken nagtalinaedda a neutral iti politika ken militar. Dayta ti gapuna a siuulpit nga indadanes ida dagiti Nazi, nga impisokda ti agarup 12,000 a Saksi kadagiti pagbaludan ken kampo konsentrasion iti nagduduma a kapaut. Kadagiti naibalud, agarup 2,000 ti pimmusay, a ginasut kadagitoy ti napapatay.
Ania ti ipasimudaag ti lila a trianggulo iti kawesda kas balud? Ti libro nga Anatomy of the SS State ilawlawagna: “Adda naisangsangayan a pagilasinan kadagiti nagduduma a kategoria dagiti balud kadagiti kampo [ti Nazi]. Sakbay ti gubat, ti nakaugalian a pamay-an tapno mapaglalasinlasin dagiti balud ket babaen ti panangidait iti trianggulo a lupot iti uniporme ti tunggal balud. Agpannuray iti kategoria ti balud ti kolor ti trianggulo: nalabaga para kadagiti naibalud gapu iti politika; lila para kadagiti Saksi ni Jehova; nangisit para kadagiti bumusbusor iti kagimongan; berde para kadagiti kriminal; derosas para kadagiti homoseksual; asul para kadagiti imigrante. Malaksid iti de kolor a trianggulo, adda duyaw a trianggulo a naidait iti kawes dagiti balud a Judio. Nairutap dayta iti de kolor a trianggulo tapno mabukel a kas iti innem ti sulina a Bituen ni David.”
“No nasaknap a malaglagip agingga iti masanguanan ti moral a kinapategna,” insurat ni Propesor John K. Roth iti librona a Holocaust Politics, “ti lila a trianggulo ket mabalin nga agtultuloy nga agserbi a kalasag maibusor iti didigra, maysa a kalasag a dagiti tirad ti trianggulona iturongna ti atension ken responsabilidadtayo iti nasayaat a kababalin a maikari unay iti panagraem dagiti tattao.” Dagiti Saksi ni Jehova ti nangaramid iti premiado a dokumentario a Jehovah’s Witnesses Stand Firm Against Nazi Assault. Apay a dimo kiddawen iti maysa a Saksi ni Jehova nga ipabuyana kenka daytoy a video?