Kayatmo Kadi ti Maaddaan iti Nasinged a Gagayyem?
TARIGAGAYAN ti kaaduan a tattao ti maaddaan iti nasinged a gagayyem. Naragragsak ti biagmo no mairanudmo dagiti kapadasam kadagiti nasinged a kakadua. Ngem kasanoka a maaddaan iti pudno a gagayyem? Dandani 2,000 a tawen ti napalabasen, impakita ni Jesus a ti tulbek ti panagballigi ti aniaman a natauan a relasion isu ti di managimbubukodan nga ayat. Insurona: “Kas iti kayatyo nga aramiden kadakayo dagiti tattao, isu met laeng ti aramidenyo kadakuada.” (Lucas 6:31) Daytoy a sasao, a masansan a maawagan iti Nabalitokan a Bilin, ipakitana a kasapulan a saanka koma a managimbubukodan, a naparaburka koma tapno maaddaanka kadagiti gagayyem. Iti ababa, tapno maaddaanka iti gayyem, sika a mismo masapul nga agbalinka a maysa a gayyem. Kasano?
Saan a kaskarina a mapatanor ti nasinged, nabara a panaggayyem. Ngamin, dagiti gagayyem ket saan a basta am-ammom. Isuda dagiti indibidual a nadekket iti riknam. Kasapulan ti panagregget tapno mapatanor ken mataginayon ti nasinged a relasion. Ti panaggayyem masansan a kalikagumanna nga ipangpangrunam dagiti kasapulan ti kaduam, saan ket a dagiti bukodmo a pagnam-ayan. Dagiti aggagayyem makipagragsak ken makipagladingitda iti maysa ken maysa.
Ipakitam a maysaka a pudno a gayyem kangrunaanna babaen ti pannakipagriknam ken panangipaaymo iti praktikal a tulong iti maysa a tao nga agkasapulan. Kuna ti Proverbio 17:17: “Ti pudno a kadua agayat iti isuamin a tiempo, ken ti kabsat a mayanak no adda rigat.” Kinapudnona, ti singgalut dagiti aggagayyem mabalin a nabilbileg ngem iti relasion dagiti agkakapamilia. Kuna ti Proverbio 18:24: “Adda kakadua nga agannayas a mamagsisina iti maysa ken maysa, ngem adda gayyem a dumekket a nasingsinged ngem iti maysa a kabsat.” Kayatmo kadi a maammuan ti ad-adu pay no kasano a mapatanor ti kasta a nasinged a panaggagayyem? Kayatmo kadi ti agbalin a paset ti maysa a grupo dagiti tattao a mabigbigbig gapu iti ayatda iti maysa ken maysa? (Juan 13:35) No kasta, maragsakan dagiti Saksi ni Jehova iti lugaryo a mangipakita kenka no kasano ti maaddaan kadagiti pudno a gagayyem.