Nataengan Ngem Saan nga Agmaymaysa

GAPU iti epekto ti panaglakay wenno panagbaket, adu ti agbalin a baldado, naiputputong iti kagimongan. Ngem saan a kasta ti kasasaad ni Fernand Rivarol, a natay idi agtawen iti 95 idiay Geneva, Switzerland. Isu ket balon ken agbibiag nga agmaymaysa gapu ta adda metten bukod a balay ti naasawaan nga anakna a babai. Nupay kaaduanna nga agtalinaed iti pagtaenganna, saan a naladingit. Masansan ti panagtugawna iti sala, ket teleponuanna dagiti tattao tapno kasaritana ida maipapan kadagiti naespirituan a banag.

Idi kapigpigsaanna, adda tiempo a naibalud ni Fernand. Apay? Kalpasan unay a nagbalin da Fernand ken ni baketna kas aktibo a Saksi ni Jehova idi 1939, bimtak ti Gubat Sangalubongan II idiay Europa. Gapu ta di kayat ni Fernand ti mangdangran iti asinoman maitunos iti takderna a naibatay iti Biblia, napukawna ti trabahona ken adda dagiti tiempo a naibalud​—iti pakabuklan a lima ket kagudua a tawen​—a nakaigapuan ti pannakaisinana ken ni baketna ken iti ubingna.

Mainaig iti napalabas, kinuna ni Fernand: “Adu ti mangmatmat a sinayangko ti natalged a trabahok ken binaybay-ak ti pamiliak. Inumsi ken trinatodak a kas kriminal. Kaskasdi, no panunotek dagidi a narigat a tawtawen, nalawlawag a malagipko no kasano a tinulongan ken sinaranaynak ni Jehova. Adun a tawen ti limmabas sipud idi, ngem nagtalinaed a natibker ti panagtalekko ken ni Jehova agingga ita.”

Dayta a pammati ti nangtignay ken ni Fernand a mangiranud iti Nainkasuratan a namnamana kadagiti sabsabali babaen ti telepono. No adda interesado a tao a makapatangna, patulodanna dayta iti literatura a naibatay iti Biblia. Kalpasanna, teleponuanna manen ida tapno ammuenna no nagustuanda ti publikasion. No dadduma, agsurat dagiti nakasabaanna tapno agyamanda kenkuana, ket kasta unay ti ragsakna.

Mabalin nga adda ti kas ken ni Fernand a makasaritam iti lugarmo. Apay a dika umimdeng iti ibagana tapno maammuam no ania dagiti patpatienna? Kanayon a siraragsak dagiti Saksi ni Jehova a mangiranud kadagiti patpatienda.