“Apay nga Addatayo Ditoy?”

DAYTA “ti kapatgan a saludsod a masapul a panunoten ti maysa a tao,” kinuna ni Elie Wiesel, a nangabak iti Nobel Prize ken nakalasat iti nasaknap a panangikisap idi dagiti Nazi iti adu a biag.

Pinampanunotmo kadin dayta a saludsod? Adun ti nangpampanunot iti dayta, ngem dida masarakan ti sungbat. Iti panangpadasna a mangammo iti kaipapanan ti biag, kastoy ti insurat ti Briton a historiador a ni Arnold Toynbee: “Ti pudno a kalat ti tao isut’ panangipadayag iti Dios ken pananggun-od iti kinaragsak manipud iti pannakikaduana Kenkuana iti agnanayon.”

Makapainteres ta nasurok a tallo a ribu a tawen ti napalabasen, ti kangrunaan a sungbat iti dayta a saludsod ket immunan a nasarakan ti maysa a lalaki a nagdinamag a managpaliiw iti biag. Kastoy ti kinuna ni masirib nga Ari Solomon: “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.”​—Eclesiastes 12:13.

Dayta a kapatgan a prinsipio ket inanamongan ni Jesu-Kristo, ti Anak ti Dios. Idi adda ditoy daga, inkagumaanna nga itan-ok ti nailangitan nga Amana. Ti panagserbi iti Namarsua kenkuana ti nangpasayaat iti biag ni Jesus. Dayta ti nangpakired kenkuana isu a kastoy ti naikunana: “Ti taraonko isu ti panangaramidko iti pagayatan daydiay nangibaon kaniak.”​—Juan 4:34.

Isu nga apay nga addatayo ditoy? Kas kada Jesus, Solomon, ken adu pay nga adipen ti Dios, mabalintay a masarakan ti pudno a makapnek ken manayon a kinaragsak iti biag no aramidentayo ti pagayatan ti Dios. Kayatmo kadi a maammuan ti ad-adu pay maipapan iti panagdayaw iti Dios “buyogen ti espiritu ken kinapudno”? (Juan 4:24) Maragsakanto dagiti Saksi ni Jehova iti lugarmo a tumulong kenka a mangsungbat iti saludsod nga “Apay nga addatayo ditoy?”