Lalaki ken Babai—Naparsuada Maipaay iti Maysa ken Maysa
KANAYON a tartarigagayan ti lalaki ken babai ti agkadua. Dayta a tarigagay ket nagtaud iti Dios. Nakita ni Jehova a saan a nasayaat nga agtultuloy nga agmaymaysa ti immuna a tao a ni Adan. Isu a nangparsua ti Dios iti maysa a “katulongan maipaay [iti lalaki], kas maysa a komplimentona.”
Kalpasan nga impaayna ti nargaan a turog ken ni Adan, nangala ni Jehova iti maysa kadagiti paragpag ni Adan sa “binukelna a babai . . . ket inyegna iti tao.” Naragsakan unay ni Adan idi makitana daytoy nagpintas a parsua ni Jehova, isu a kinunana: “Daytoy iti kamaudiananna ti tulang dagiti tulangko ken lasag ti lasagko.” Gapu kadagiti galadna kas maysa a babai, pudno a nakaay-ayat ni perpekto nga Eva. Ket maikari met ni Adan iti panagraem gapu iti dignidadna kas lalaki. Naparsuada maipaay iti maysa ken maysa. Kuna ti Biblia: “Dayta ti makagapu a ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.”—Genesis 2:18-24.
Ngem iti kaaldawantayo, masinasina dagiti pamilia, ken masansan nga adda panagabuso wenno kinamanagimbubukodan iti nagbaetan dagiti agassawa. Ti panaginnartap ti lalaki ken babai ti maysa a makagapu a dida agtunos ken agkinnaawatan. Maikontra amin dagita iti panggep ti Dios para iti lalaki ken babai. Nadisenio ti lalaki para iti naisangsangayan nga akem ditoy daga. Adda met naisalsalumina ken maikari nga akem ti babai kas katulongan ti lalaki. Nairanta nga agtrabahoda a sangsangkatunos. Sipud idi rugi ti kaadda ti tao, dagiti lallaki ken babbai a mangraraem iti urnos ti Dios simamatalek nga inkagumaanda a tungpalen dagiti akem nga intuding ni Jehova kadakuada isu a naragragsak ken ad-adda a makapnek ti panagbiagda. Ania dagitoy nga akem, ken kasano a matungpaltayo ida?
[Ladawan iti panid 3]
Nadisenio ti lalaki ken babai a maaddaan kadagiti nadayaw nga akem iti urnos ti Dios