“Impapilitna nga Umaykami”

AGDINDINAMAG ti kinamanagpadagus kadagiti Makindaya a pagilian. Kas pagarigan, ti maysa a pamilia idiay India mabalin a kaykayatda ti mabisinan tapno adda taraon a maidasarda iti dida ninamnama a sangaili. Ti maysa nga ina idiay Iran kanayon a mangipempen iti taraon iti refrigerator tapno adda maidasarna kadagiti sangaili a dumteng iti aniaman nga oras.

Ti kasta a kinamanagparabur ket nabatad iti adu a tattao a nadakamat iti Biblia. Ti maysa a nagsayaat a pagarigan ket ni Lidia, nalabit maysa a Judio a proselita nga agnanaed idiay Filipos, ti kangrunaan a siudad iti distrito ti Macedonia. Iti maysa nga aldaw ti sabbath, ni apostol Pablo ken ti kakaduana a nagdaliasat nasarakanda ni Lidia ken ti dadduma pay a babbai a naguummong iti asideg ti karayan iti ruar ti Filipos. Linuktan ni Jehova ti puso ni Lidia bayat nga agsasao ni Pablo iti dayta a kanito. Nagbanaganna, isu ket nabautisaran agraman dagiti kameng ti sangakabbalayanna. Kalpasanna, kastoy ti impakaasina kada apostol Pablo ken kadagiti kakaduana a nagdaliasat: “No impatoyo a matalekak ken Jehova, sumrekkayo iti balayko.” Kinuna ni Lucas a kadua ni Pablo: “Impapilitna nga umaykami.”​—Aramid 16:11-15.

Kas ken Lidia, dagiti Kristiano ita ipakpakitada ti kinamanagpadagusda kadagiti kapammatianda a kas kadagiti agdaldaliasat a manangaywan ken kadagiti assawa dagitoy. Dagitoy a manangsangaili ‘ipappapilitda nga umay’ dagiti kapammatianda. Kas resultana, dagidiay mangipakpakita iti kinamanagpadagus matagiragsakda ti makaparegta a saritaan ken naespirituan a panaglalangen. Nupay saan a nabaknang ti kaaduan kadagiti Saksi ni Jehova, ‘sursurotenda ti dalan ti kinamanagpadagus.’ (Roma 12:13; Hebreo 13:2) Makaparagsak kadakuada ti pannangted. Talaga nga umiso ti kinuna ni Jesus: “Ad-adu ti kinaragsak iti panangted ngem iti panangawat.”​—Aramid 20:35.