Ti Kiddaw ni Adryana
ADDA kiddaw ni Adryana, maysa nga innem ti tawenna nga ubing a babai idiay Tulsa, Oklahoma, E.U.A. Maipadis dayta iti kiddaw ni salmista David a nangikanta idi iti: “Maysa a banag ti kiniddawko ken Jehova—isu dayta ti sapulekto, nga agnaedak koma iti balay ni Jehova iti amin nga al-aldaw ti panagbiagko, tapno kitaek ti kinamakaay-ayo ni Jehova ken tapno imatangak ti templona buyogen ti panangtagipateg.”—Salmo 27:4.
Idi innem a bulan pay laeng ni Adryana, nadayagnos nga adda sakitna a neuroblastoma, maysa a makapapatay a tumor nga agtubo iti nadumaduma a paset ti utek ken duri. Gapu iti dayta, naparalisado ti dua a sakana. Namin-adu nga inopera dagiti doktor ken makatawen a naipasidong iti chemotherapy.
Saan a kas ken Adryana ken ni nanangna, ti tatang ni Adryana ket saan a Saksi ni Jehova. Isu ket nakiuman iti maysa nga organisasion a mangikagkagumaan a mangipaay iti kiddaw dagiti ubbing nga addaan kadagiti makapapatay a sakit. Kiniddawna iti dayta nga organisasion nga ipasiarda koma ni Adryana iti maysa a nalatak a parke a pagpalpaliwaan. Sakbay a patganda ti kiddaw, ininterbiuda nga umuna ni Adryana. Imbaga ni Adryana nga agyaman unay gapu iti panangipategda kenkuana ngem imbagana kadakuada a kaykayatna laengen ti agpasiar idiay Bethel, ti sentro ti sangalubongan a trabaho dagiti Saksi ni Jehova idiay New York. Idi naammuanna a ni tatangna ti nagkiddaw iti dayta nga organisasion, nagkararag ni Adryana ken Jehova tapno maaddaan koma iti gundaway nga agpasiar idiay Bethel. Nupay impagarup ti organisasion a saan a makaliwliwa iti maysa nga ubing ti panagpasiar iti Bethel, pinatganda met laeng ti kalikagum ni Adryana idi immanamong ni tatangna.
Ni Adryana ket kinuyog ni nanang ken ni manangna, ken maysa a gayyemna a nagbiahe idiay New York tapno agpasiar idiay Bethel iti damo a gundaway. “Sinungbatannak ni Jehova,” kinuna ni Adryana. “Ammok a kayatna nga agpasiarak idiay Bethel. Nakitak no kasano ti pannakaaramid dagiti libro, magasin, ken Biblia. Napimpintas dayta ngem iti parke a pagpalpaliwaan.”
Ni Adryana ‘nakitana ti kinamakaay-ayo ni Jehova’ ken naapresiarna ti panagandar ti sentro dagiti aktibidad ti ili ni Jehova iti kaaldawantayo. Awisendakayo nga agpasiar met iti Bethel. Malaksid iti sangalubongan a hedkuarter dagiti Saksi ni Jehova idiay New York, adda pay dagiti sanga nga opisinana iti nadumaduma a paset ti lubong.