Kinadakes—Saan Kadin a Makontrol?
Adda inosente nga ubing a lalaki a nangpidut iti maysa a bomba a naimula iti daga―a nagresulta iti panagbalinna a bulsek ken pawad iti tungpal-biag. Maysa nga ina ti nangilemmeng iti kappasngay nga anakna iti basuraan iti igid ti kalsada sana pinanawan. Maysa a nasesante iti trabaho ti nagsubli iti sigud a pagtartrabahuanna ket pinaltoganna ti asinoman a nakitana, sa pinatayna ti bagina. Adda mararaem nga umili a seksual a nangabuso kadagiti awan gawayda nga ubbing.
NAKALKALDAANG ta gagangayen dagita a dakes nga aramid iti kaaldawantayo. Ngem masansan a nakarkaro pay dagiti damag maipapan iti panangikisap iti puli ken terorismo. “Iti kadaksanna, ti maika-20 a siglo ti makuna a siglo ni Satanas,” kinuna ti maysa nga editorial a naipablaak idi 1995. “Awanen ti sabali a panawen a nangipakitaan dagiti tattao iti kabaelan ken gagarda a mangpapatay iti minilion a tattao gapu iti puli, relihion wenno kasasaad.”
Maigiddato iti dayta, dagiti tattao rugrugitanda ti angin ken ti daga, ib-ibusenda dagiti kinabaknangna, ken ungawenda ti adu a kita ti biag. Maparmekto kadi ti sangatauan amin dagitoy a kinadakes ket pagbalinenda ti lubong a nasaysayaat, nataltalged a lugar? Wenno ti panangikagumaan a mangaramid iti kasta ket mayarig iti panangsuba iti dalluyon babaen ti sagad? Maysa a propesor nga adun ti insuratna maipapan iti kinadakes, kinunana: “Nasged ti tarigagayko a mangbalbaliw iti lubong tapno sumayaat. Ngem awan ti pakakitaan a sumaysayaat ti lubong.” Nalabit kasta met ti mariknam.
Ti pagturturongan ti lubong mabalin a maidilig iti barko nga aglaylayag iti taaw nga inaldaw a kumarkaro ti kinadawelna. Nupay awan ti mayat nga agturong iti dayta a direksion, napaay ti amin a panangikagumaan a mangbalbaliw iti direksion ti barko. Agturong latta ti barko iti makapapatay a papananna.
No maminsan, ti dumakdakes a kasasaad mabalin a maigapu iti kinaimperpekto ti tao. (Roma 3:23) Kaskasdi, ti kinakaro ti kinadakes, ti kasaknapna, ken ti kasansanna kasla nakarkaro ngem iti kabaelan ti tao nga aramiden. Posible kadi nga adda di makita a nabileg ken dakes a puersa a mangiturturong iti sangatauan? No kasta, ania dayta, ken kasano a masalaknibantayo ti bagitayo? Sungbatan ti sumaganad nga artikulo dagitoy a saludsod.
[Picture Credit Line iti panid 3]
© Heldur Netocny/Panos Pictures