Nagan ti Dios iti Kanta a Ruso
IDI 1877, ti nakalatlatak a kompositor a Ruso a ni Modest Mussorgsky impablaakna ti maysa a libro a naglaon kadagiti kankanta a naibatay kadagiti salaysay a napasamak kadagiti lugar a nadakamat iti Biblia. Insuratna iti maysa a gayyemna: “Nangputarak iti maysa nga eksena a Jesus Navinus [Joshua iti Ingles] a naan-anay a naibatay iti Biblia ken nangisalaysay pay iti ruta ti martsa ti panagballigi ni Navinus idiay Canaan.” Kadagiti dadduma pay a pinutarna, agraman “Ti Pannakadadael ni Senaquerib,” inusar met ni Mussorgsky dagiti tema ken karakter iti Biblia.
Makapainteres ta iti “Jesus Navinus,” agraman ti 1874 nga edision “Ti Pannakadadael ni Senaquerib,” ni Mussorgsky dinakamatna ti Dios babaen ti panangusarna iti nagan ti Dios iti Ruso, a nailadawan iti Hebreo a Kasuratan babaen ti uppat a konsonante—יהוה (YHWH)—ken agparang iti dandani 7,000 a daras.
Gapuna, dagitoy a putar ni Mussorgsky ipakitana a ti nagan ti Dios a Jehova a nailanad iti Biblia ket pagaammo idin iti kagimongan ti Russia sakbay pay a nangrugi ti maika-20 a siglo. Maitutop daytoy yantangay ni Jehova kinunana ken Moises: “Daytoy ti naganko agingga iti tiempo a di nakedngan, ket daytoy ti pakalaglagipan kaniak iti kinapkaputotan.”—Exodo 3:15.
[Ladawan iti panid 32]
Piesa: Ti Scientific Music Library of the Saint-Petersburg State Conservatory a naipanagan ken N.A. Rimsky-Korsakov; buya iti kalsada: National Library of Russia, St. Petersburg
[Picture Credit Lines iti panid 32]
St. Petersburg Conservatory idi 1913, a nakaidulinan ti kanta a pinutar ni Mussorgsky