Apay nga Ipalpalubos ti Dios ti Kinadakes?

ITI intero a lubong, agraraira ti kinadakes ken panagsagaba. Gapu kadagiti gubat, adu ti matmatay a sibilian ken soldado. Nakasaksaknap ti krimen ken kinaranggas. Nalabit nabiit pay a nabiktimaka iti panangidumduma ken kinaawan hustisia. Gapu kadagita a maim-imatangam ken mapaspasaram, nalabit naisalsaludsodmon, ‘Apay nga ipalpalubos ti Dios ti kinadakes?’

Adun a tattao ti nangyimtuod iti dayta a saludsod. Agarup 3,600 a tawen ti napalabasen, kastoy ti inyimtuod ni Job, maysa a nasungdo nga adipen ti Dios: “Apay ngata nga agtultuloy nga agbiag dagiti mismo a nadangkes?” (Job 21:7) Gapu ta maaburido iti kinadakes dagiti kailianna, kastoy ti inyimtuod ni mammadto Jeremias, agarup 2,600 a tawenen ti napalabas: “Apay a ti dalan dagidiay nadangkes isu ti nagballigi, nga amin dagidiay agar-aramid iti kinagulib isuda dagidiay awan pagdandanaganna?” (Jeremias 12:1) Ammo nga agpada da Job ken Jeremias a ti Dios ket nalinteg. Nupay kasta, saanda a maawatan no apay a nakasaksaknap ti kinadakes. Nalabit kasta met ti mangburburibor iti panunotmo.

Sigun iti dadduma a tattao, nakem ti Dios ti mapaspasamak a kinadakes ken panagsagaba. Adda met dagiti mangpampanunot, ‘No ti Dios ket mannakabalin-amin, nalinteg, ken naayat, apay a dina pagpatinggaen ti kinadangkes ken panagsagaba? Apay nga agingga ita ket ipalpalubosna nga agtultuloy ti kinadakes?’ Dagiti sungbat kadagitoy ken ti dadduma pay nga agkakapateg a saludsod ket mausig iti sumaganad nga artikulo.

[Picture Credit Line iti panid 3]

AP Photo/Adam Butler