No Apay a Narigat ti Agbalin a Napakumbaba

MATMATAN ti adu a tattao a saanen a matarigagayan a galad ti kinapakumbaba. Dagiti naballigi a lider ken natan-ok a tattao ket dagidiay managimbubukodan, natangsit, ken naturay. Ap-apalan ti kaaduan ti kabibiag dagiti nabaknang ken nalatak imbes a dagidiay napakumbaba ken nanumo. Imbes nga agpakumbabada, ipampannakkel dagiti naballigi a nagun-odda dayta gapu iti bukodda a pigsa.

Maysa a managsirarak a taga-Canada ti nagkuna a limmanlan ti kinaagum ken kinatangsit iti pagilianda. Marikna ti dadduma nga agbibiagtayo iti kagimongan a mangipangpangruna iti ragragsak imbes a ti panagbalin a responsable. Mapaliiwda nga ad-adda a managimbubukodan dagiti tattao ita. Iti kastoy a lubong, agparang a saanen a matarigagayan ti galad a kinapakumbaba.

Adda met ketdi sumagmamano nga umanamong a makaay-ayo a kababalin ti kinapakumbaba ta nalaka a pakilangenan dagiti kasta a tattao. Ngem gapu ta nasaknap ti panagsisinnalisal iti daytoy a lubong, dadduma ti maamak di la ket ta maibilangda a nakapuy no napakumbabada.

Impadto ti Sao ti Dios nga iti kaaldawantayo, ‘napalangguad ken natangsit’ dagiti tattao. (2 Timoteo 3:1, 2) Umanamongkayo kadi a matungtungpal ita daytoy a padto? Iti panagkunayo, makaay-ayo kadi a galad ti kinapakumbaba? Wenno ibilangyo a nakapuy ken nalaka a magundawayan dagiti napakumbaba?

Iti kinapudnona, nangipaay ti Biblia kadagiti agkakaimbag a rason no apay nga ipateg ken patanorentayo ti kinapakumbaba. Nangted iti natimbeng ken umiso a panangmatmat iti dayta a galad ken ipakitana a ti pudno a kinapakumbaba ket paglaingan, saan a pagkapuyan. Ilawlawag dayta ti sumaganad nga artikulo.

[Ladawan iti panid 3]

Ania koma ti panangmatmattayo kadagiti nagapuanantayo?