Ikagkagumaanyo Kadi nga Iranud Dagiti Patpatienyo?

“ADDA kadi naan-anay a kinapudno?” Dayta ti topiko iti salip ti panagsurat iti intero a Poland. Kastoy ti maysa kadagiti annuroten dayta a salip: “Saantay a kasapulan ti naan-anay a kinapudno. Total, awan met ti naan-anay a kinapudno.” Ni Agata, maysa a Saksi ni Jehova ken agtawen iti 15 nga estudiante iti haiskul, ginundawayanna nga inranud dagiti patpatienna.

Kas panagsaganana iti dayta a salip, inkararagna ti panangiwanwan ni Jehova sa nagsukimat kadagiti material a kasapulanna. Nakasarak kadagiti makatulong nga impormasion iti Ti Pagwanawanan a Hulio 1, 1995. Inadawna ti saludsod ni Poncio Pilato ken Jesus: “Ania ti kinapudno?” (Juan 18:38) Iti salaysayna, imbaga ni Agata a mangumsi dayta a saludsod, a kasla ibagbaga ni Pilato: ‘Kinapudno? Ania dayta? Awan ti kasta a kinapudno!’ Kinuna ni Agata: “Ti saludsod ni Pilato ipalagipna kaniak dagiti annuroten ken ti topiko iti salip.”

Kalpasanna, inlawlawagna no kasano a nangrugi ti relatibismo​—ti kapanunotan a mabalin nga agpada nga “umiso” ti dua nga agsupadi a panangmatmat iti pudno. Inyimtuodna, “Asino kadatayo ti mayat nga aglugan iti eroplano no saantay a patien a naan-anay nga umiso dagiti linteg ti panagpatayab?” Sa impatuldona ti kunaen ti Biblia: “Ti panagtalek iti Sao ti Dios ket naan-anay a naibatay kadagiti napaneknekan nga impormasion.” Inyebkasna a sapay koma ta dagidiay napasnek a mangsapsapul iti naan-anay a kinapudno igaedda a biroken dayta.

Nangabak ni Agata iti sertipiko ken naaddaan iti gundaway a mangibasa iti dayta iti klaseda. Sumagmamano kadagiti kaeskuelaanna ti nagpayadal kenkuana iti Biblia. Maragsakan ni Agata ta inkagumaanna nga inranud dagiti patpatienna. Wen, mangyeg kadagiti nasayaat a resulta ti panagbalinyo nga alerto a mangiranud iti pammatiyo. Ania dagiti gundaway a mabalinyo nga iranud dagiti patpatienyo?