Umadanika iti Dios
Maawatanna ti Pakarigatantayo
“TI EMPATIA ket pannakarikna iti saem a sagsagabaen ti sabali a tao.” Kasta ti panangdepinar ti maysa a lakayen a misionero a Saksi ni Jehova iti daytoy a nakapatpateg a galad. Ni Jehova a Dios ti kangrunaan nga ulidan ti empatia. Mariknana a mismo ti saem a sagsagabaen dagiti tattao. Kasano a masiguradotayo dayta? Naan-anay a nayanninaw ti nadungngo nga empatia ni Jehova babaen kadagiti sasao ken tigtignay ni Jesus idi adda ditoy daga. (Juan 5:19) Usigenyo, kas pagarigan, ti pasamak a nadeskribir iti Juan 11:33-35.
Idi saan a napakpakadaan a natay ti gayyem ni Jesus a ni Lazaro, napan ni Jesus iti lugar da Lazaro. Sigurado nga agdungdung-aw idi dagiti kakabsat ni Lazaro a da Maria ken Marta. Dungdungnguen unay ni Jesus daytoy a pamilia. (Juan 11:5) Ania ti inaramidna? Ibaga ti salaysay: “Ni Jesus, . . . idi nakitana [ni Maria] nga agsangsangit ket dagiti Judio nga immay a nakikuyog kenkuana agsangsangitda, nagsennaay iti espirituna ket nariribukan; ket kinunana: ‘Sadino ti nangikabilanyo kenkuana?’ Kinunada kenkuana: ‘Apo, umayka ket kitaem.’ Nagarubos dagiti lua ni Jesus.” (Juan 11:33-35) Apay a nagsangit ni Jesus? Pudno, natay ti ing-ingungotenna a gayyem a ni Lazaro, ngem ammona a dandaninan pagungaren. (Juan 11:41-44) Ngarud, adda kadi pay sabali a banag a nangtukay iti rikna ni Jesus?
Basaenyo manen dagiti naadaw a sasao. Paliiwenyo nga idi nakita ni Jesus da Maria ken dagiti nakikuyog kenkuana nga agsangsangit, “nagsennaay” ken “nariribukan.” Ti sasao a nausar ditoy iti orihinal a lenguahe ipamatmatna ti nakaro a sennaay.a Kasta unay ti pannakatukay ti rikna ni Jesus iti nakitana. Paneknekan ti panagarubos ti luana a nakaro ti sennaayna. Nalawag a nagsennaay ti puso ni Jesus gapu ta nariknana ti panagladingit ti dadduma. Nagsangitkayo met kadin gapu ta adda ipatpategyo nga agsangsangit?—Roma 12:15.
Ti empatia ni Jesus ket mangted kadatayo iti naun-uneg a pannakaawat maipapan kadagiti galad ken pamay-an ti Amana a ni Jehova. Laglagipenyo a naan-anay nga imparangarang ni Jesus dagiti kababalin ni Amana ta mabalinna a kunaen: “Ti nakakita kaniak nakitana met ti Ama.” (Juan 14:9) Isu a no mabasatayo a “nagarubos dagiti lua ni Jesus,” masiguradotayo a marikrikna a mismo ni Jehova ti saem a marikrikna dagiti agdaydayaw kenkuana. Kinapudnona, dadduma a mannurat ti Biblia patalgedanda daytoy a kinapudno. (Isaias 63:9; Zacarias 2:8) Talaga a nadungngo a Dios ni Jehova!
Makaay-ayo ti tao a mangiparparangarang iti empatia. No maupay wenno malmaldaangantayo, dagus a ti asitgantayo ket daydiay tao a mannakipagrikna ken makatarus iti kasasaadtayo. Ad-adda pay ngarud nga umadanitayo ken Jehova, maysa a naasi a Dios a mannakipagrikna iti pakarigatantayo ken makatarus iti bambanag a pakaigapuan ti panagarubos ti luatayo!—Salmo 56:8.
[Footnote]
a Ti Griego a sao a naipatarus a “nagarubos dagiti lua” masansan a tuktukoyenna ti “naulimek a panagsangit,” idinto ta ti sao a nausar a mangdeskribir iti panagsangit ni Maria ken dagiti kimmuyog kenkuana mabalin nga ipamatmatna “ti naariwawa a panagsangit, panaganug-og.”