Saludsod Dagiti Agbasbasa

Talaga Kadi a Sangalubongan ti Layus Idi Panawen ni Noe?

Ti Layus idi panawen ni Noe ket napasamak nasurok nga 4,000 a tawenen ti napalabas. Gapuna, natayen ti amin a nakakita iti daydi a pasamak. Nupay kasta, adda naisurat a rekord maipapan iti dayta a didigra, a mangibaga a natinep ti katayagan idi a bantay.

Kuna ti naisurat a rekord: “Ti layus nagtultuloy iti uppat a pulo nga aldaw iti rabaw ti daga . . . Ket ti dandanum linapunosda ti daga iti kasta unay nga amin dagiti natayag a bantay nga adda iti baba ti intero a langlangit natinep. Agingga iti sangapulo ket lima a kasiko [agarup 6.5 a metro] linapunos ida ti dandanum ket ti bambantay naabbongan.”​—Genesis 7:17-20.

Nalabit nga ipapan ti dadduma a daydi sangalubongan a layus ket sarsarita wenno aglablabes laeng nga estoria. Ngem saan a kasta! Kinapudnona, agingga ita adu a paset ti daga ti natinep iti danum. Ti baybay saknapanna ti agarup 71 a porsiento ti daga. Isu a no an-anagen, adda pay laeng ita dagiti danum daydi a layus. Ken no marunaw dagiti glacier wenno dadakkel a bloke ti yelo ken dagiti naurnong a niebe iti abagatan ken amianan a pungto ti globo, umadalem ti baybay a mabalin a mangtinep kadagiti siudad kas iti New York ken Tokyo.

Sigun kadagiti geologo a mangad-adal iti kasasaad ti daga iti makin-amianan a laud a paset ti Estados Unidos, adda agarup 100 a makadidigra a layus a nanglapunos idi iti dayta a lugar. Maysa kadagita a layus ti maipagarup a kellaat a nanglapunos iti dayta a rehion iti kaadalem nga 600 a metro ken kapegges a 105 a kilometro kada oras​—dandanum nga agrukod iti 2,000 a kilometro kubiko ken nasurok a dua a trilion a tonelada. Maibatay kadagiti umasping a takuat, mamati ti dadduma a sientista a posible a napasamak ti sangalubongan a layus.

Ngem kadagidiay mamati a ti Biblia ket Sao ti Dios, saan laeng a posible a napasamak ti sangalubongan a layus. Talaga a napasamak dayta. Kinuna ni Jesus iti Dios: “Ti saom ket kinapudno.” (Juan 17:17) Insurat ni apostol Pablo a ti pagayatan ti Dios ket “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:3, 4) No sarsarita laeng ti linaon ti Sao ti Dios, kasano koma a maisuro ni Pablo kadagiti pasurot ni Jesus dagiti kinapudno maipapan iti Dios ken iti panggepna?

Saan laeng a namati ni Jesus a ti Layus ket pudno a napasamak no di ket mamati pay a sangalubongan dayta. Iti naindaklan a padtona maipapan kadagiti pasamak bayat ti kaaddana ken ti panungpalan daytoy a sistema ti bambanag, inyarigna dagita kadagiti pasamak idi panawen ni Noe. (Mateo 24:37-39) Nagsurat met ni apostol Pedro maipapan iti layus idi kaaldawan ni Noe: “Babaen kadagidiay a pamay-an nagpasar iti pannakadadael ti lubong iti daydi a tiempo idi nalayus iti danum.”​—2 Pedro 3:6.

No saan a pudno a nagbiag ni Noe ken sarsarita laeng ti sangalubongan a layus, awan ngarud ti kapapay-an dagiti pakdaar da Pedro ken Jesus kadagidiay agbibiag ita kadagiti maudi nga aldaw. Imbes nga agserbi dayta kas pakdaar, libegenna ti naespirituan a pannakaawat ti maysa ken pagpeggadenna ti gundawayna a makalasat iti rigat a dakdakkel ngem daydi Layus idi panawen ni Noe.​—2 Pedro 3:1-7.

No maipapan iti agtultuloy nga asina iti ilina, kinuna ti Dios: “No kasano nga insapatak a ti dandanum ni Noe saanton a lumasat iti rabaw ti daga, kasta met nga insapatak a saankanto a karurod wenno uray babalawen.” No kasano a daydi Layus idi panawen ni Noe linapunosna ti daga, ti naayat a kinamanangngaasi ti Dios maiburay met kadagidiay agtaltalek kenkuana.​—Isaias 54:9.