Nakasaganaka Kadi a Mangidepensa iti Pammatim?

NAIPASANGOKA kadin iti kasasaad a nariknam a masapul nga idepensam ti pammatim? Usigem ti napasamak ken Susana, ti 16 anyos a kabsat idiay Paraguay. Bayat ti klasena maipapan iti etika, adda nangibaga a dagiti Saksi ni Jehova ket saanda a bigbigbigen ti “Daan a Tulag,” ni Jesu-Kristo, wenno ni Maria. Adda pay sabali a nangibaga a dagiti Saksi ket panatiko ken kaykayatda laengen ti matay ngem ti agpaagas. No sika ni Susana, ania ti aramidem?

Nagkararag ni Susana ken Jehova sana intayag ti imana. Dandanin malpas ti klase, isu a kiniddawna iti maestrana a mapalubosan a mangiparang iti presentasion a mangilawlawag iti patpatienna kas maysa kadagiti Saksi ni Jehova. Immannugot ti maestra. Bayat ti simmaganad a dua a lawas, insagana ni Susana ti presentasionna babaen ti panangusarna iti broshur a napauluan Dagiti Saksi ni Jehova​—Siasinoda? Ania ti Patpatienda?

Iti aldaw a panangiparangna iti presentasionna, inlawlawag ni Susana ti namunganayan ti nagan a Saksi ni Jehova. Inlawlawagna met ti namnamatayo para iti masanguanan ken no apay a saantayo nga agpayalison iti dara. Kalpasanna, inawisna ti klase tapno agsaludsodda. Nagitayag ti kaaduan a kaklasena. Nasdaaw ti maestra kadagiti naibatay-Biblia a sungbat ni Susana kadagiti saludsod.

Kinuna ti maysa nga estudiante: “Nakapanakon naminsan iti Kingdom Hall, ket awan pulos ti nakitak nga imahen.” Kayat ti maestra a maammuan no apay. Imbasa ni Susana ti Salmo 115:4-8 ken Exodo 20:4. Nasdaaw ti maestra, isu a kinunana, “Apay ngata a napno dagiti simbaanmi kadagiti imahen idinto ta kondenaren gayam ti Biblia dagita?”

Nagtultuloy iti 40 a minuto ti saludsod ken sungbat a diskusion. Idi dinamag ni Susana no kayat dagiti kaklasena a mabuya ti video a No Blood​—Medicine Meets the Challenge, immannugotda amin. Gapuna, nangyeskediul ti maestra iti sabali pay a presentasion iti kabigatanna. Kalpasan ti video, inlawlawag ni Susana dagiti alternatibo a panangagas nga awaten ti dadduma kadagiti Saksi ni Jehova. Mainaig iti dayta, kinuna ti maestra: “Diak ammo a kasta gayam kaadu ti alternatibo a panangagas. Ita laeng a naammuak dagiti pagimbagan ti panangagas a di mayalison ti dara. Agpaay laeng kadi kadagiti Saksi ni Jehova dagita a kita ti panangagas?” Idi nangngegna a mabalin a maipaay dayta iti isuamin, kinuna ti maestra, “Inton agtuktok manen dagiti Saksi ni Jehova iti ridawko, makisaritaakton kadakuada.”

Imbes a 20 a minuto laeng ti presentasion ni Susana, a kas iti insaganana, pimmaut dayta iti tallo nga oras. Kalpasan ti makalawas, ti dadduma a kaklasena ket nangiparang met iti presentasion maipapan kadagiti patpatien ti relihionda. Iti ngudo ti presentasionda, adu ti timmaud a saludsod, ngem saanda a naidepensa ti pammatida. Inyimtuod kadakuada ti maestra, “Apay a saanyo a maidepensa ti pammatiyo a kas iti kaklaseyo a maysa kadagiti Saksi ni Jehova?”

Insungbatda: “Ad-adalenda ngamin a talaga ti Biblia idinto ta dakami ket saan.”

Ti maestra kinitana ni Susana sana kinuna: “Talaga nga ad-adalem ti Biblia ken ikagkagumaam nga aramiden ti ibagbagana. Nagsayaat dayta.”

Mabalin a nagulimek koma lattan ni Susana. Ngem babaen ti panagsaona tapno maidepensana ti pammatina, sinurotna ti nasayaat nga ulidan ti di nainaganan nga Israelita a balasitang a kinautibo idi dagiti Siriano. Naipan dayta a balasitang iti balay ti Siriano a heneral a ni Naaman, nga addaan iti makapaariek a sakit iti kudil. Kinuna dayta nga Israelita a balasitang iti apona a babai: “No adda laeng koma ni apok iti sanguanan ti mammadto nga adda idiay Samaria! Iti kasta mapaimbagna koma iti kukutelna.” Narikna ti balasitang a masapul a saksianna ti maipapan iti pudno a Dios. Gapu iti dayta, ti apona a ni Naaman ket nagbalin a maysa nga agdaydayaw ken Jehova.​—2 Ar. 5:3, 17.

Umasping iti dayta, narikna ni Susana a masapul a saksianna ti maipapan ken Jehova ken ti ilina. Gapu iti panangidepensana iti pammatina idi nakuestion ti patpatienna, tinungpal ni Susana daytoy a bilin ti Biblia: “Santipikarenyo ti Kristo kas Apo kadagiti pusoyo, a kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a kababalin ken nauneg a panagraem.” (1 Ped. 3:15) Nakasaganaka kadi a mangidepensa iti pammatim ken agdisnudoka no adda gundaway a masapul nga aramidem dayta?

[Ladawan iti panid 17]

Dagitoy ti makatulong kenka a mangidepensa iti pammatim