Agbibiagtayo Itan iti Napeggad a Tiempo
IMPADTO ti Biblia a mapasaran ti sangatauan “dagiti napeggad a tiempo a narigat a pakilangenan.” Dineskribirna dayta a panawen kas dagiti “maudi nga aldaw.” (2 Timoteo 3:1-5; 2 Pedro 3:3-7) Dayta met la a tiempo ti dinakamat ni Jesu-Kristo idi sinungbatanna ti saludsod dagiti adalanna maipapan iti “panungpalan ti sistema ti bambanag.” (Mateo 24:3) Agbibiagtayo kadin kadagiti maudi nga aldaw? Sakbay a sungbatam dayta, pagdiligem nga umuna dagiti impadto ti Biblia ken dagiti nabiit pay a damag a nadakamat iti baba.
Ti impadto ti Biblia: panaggugubat dagiti nasion iti lubong—Lucas 21:10; Apocalipsis 6:4.
Dagiti nabiit pay a damag: “Dagiti tattao a napapatay iti gubat iti maika-20 a siglo ket mamitlo nga ad-adu ngem iti dagup dagiti natay iti amin a gubat manipud idi umuna a siglo K.P. agingga idi 1899.”—Worldwatch Institute.
Ti impadto ti Biblia: kinakirang ti taraon ken sakit—Lucas 21:11; Apocalipsis 6:5-8.
Dagiti nabiit pay a damag: Idi 2004, mapattapatta a 863 a milion a tattao iti lubong ti awanan iti umdas a taraon, ad-adu dayta iti 7 a milion ngem idi 2003.—United Nations Food and Agriculture Organization.
Agarup maysa a bilion a tattao ti agnanaed kadagiti kaiskuateran; 2.6 a bilion ti awanan iti nasayaat a kasilias ken pagbasuraan; 1.1 a bilion ti awanan iti mainum a nadalus a danum.—Worldwatch Institute.
Addaan iti malaria ti 500 a milion a tattao; 40 a milion ti addaan iti HIV-AIDS; 1.6 a milion ti natay gapu iti sarut idi 2005.—World Health Organization.
Ti impadto ti Biblia: madaddadael ti daga—Apocalipsis 11:18.
Dagiti nabiit pay a damag: “Gapu iti ar-aramiden dagiti tattao, posible a maungawto ti adu ken nadumaduma a kita ti animal ken mulmula iti planetatayo.” “Iti intero a lubong, ti agarup dua a kakatlo kadagiti maar-aramidan ti nakaparsuaan a mangsustiner iti tao ket natakuatan a kumapkapuyen.”—Millennium Ecosystem Assessment.
“Dagiti gas nga inaramid ti tao a mangpabpabara unay iti atmospera ket nagresulta iti nakaro a panagbaliwbaliw ti klima iti Daga a posible a mamagpeggad unay iti planetatayo.”—NASA, Goddard Institute for Space Studies.
Ti impadto ti Biblia: ti naimbag a damag maipapan iti Pagarian ti Dios ket maikaskasaba iti intero a daga—Mateo 24:14; Apocalipsis 14:6, 7.
Dagiti nabiit pay a damag: Bayat ti 2007, adda kangatuan a bilang dagiti Saksi ni Jehova nga 6,957,854 ken nangbusbosda iti nasurok a 1.4 a bilion nga oras iti panangikasaba iti naimbag a damag maipapan iti Pagarian ti Dios iti 236 a pagilian.—2008 Tinawen a Libro Dagiti Saksi ni Jehova.
Kas nadakamaten, impadto ti Biblia nga iti laksid ti amin a di makaay-ayo a damag, adda panggapuantayo nga agbalin a positibo. Dinakamat ni Jesus ti “naimbag a damag” maipapan iti Pagarian ti Dios. Ania ti Pagarian ti Dios? Apay nga ipapaayanna ti sangatauan iti panggapuan a manginanama iti nasaysayaat a masanguanan? Ken kasano a matulongannaka ti Pagarian ti Dios?
[Blurb iti panid 5]
Impadto ti Biblia dagiti kasasaad iti lubong a maim-imatangantayo ita