Umadanika iti Dios
“Agbalinkayo a Tumutulad iti Dios”
KINAMANANGNGAASI. Pannakipagrikna. Pammakawan. Ayat. Nakalkaldaang ta manmano laengen ita ti mangiparparangarang kadagita a makaay-ayo a kababalin. Sika ngay? Nariknam kadi nga uray ania ti aramidem, marigatanka a mangpatanor kadagita nga agkakaimbag a galad? Nalabit nga iparikna ti manangallilaw a puso a saanmo a pulos a mapatanor dagiti makaay-ayo a galad gapu iti sumagmamano a lapped, kas iti rimmamut a dakes a kababalin wenno nasaem a kapadasan. Ngem ti Biblia pasingkedanna ti makaliwliwa a kinapudno—ammo ti Namarsua a kabaelantayo a patanoren dagiti naimbag a kababalin.
Ti Sao ti Dios idagadagna kadagiti pudno a Kristiano: “Gapuna, agbalinkayo a tumutulad iti Dios, kas annak a dungdungnguen.” (Efeso 5:1) Dagita a makaliwliwa a sasao ipakitada nga agtalek ti Dios kadagiti adipenna. Kasano? Ni Jehova a Dios pinarsuana ti tao iti ladawanna, sigun iti langana. (Genesis 1:26, 27) No kasta, kinawesanna dagiti tattao kadagiti galad nga umasping kadagiti galadna.a Gapuna, idi indagadag ti Biblia kadagiti Kristiano nga ‘agbalinda a tumutulad iti Dios,’ arigna nga ibagbaga a mismo ni Jehova iti tunggal maysa kadakuada: ‘Agtalekak kenka. Ammok nga iti laksid dagiti pagkapuyam, kabaelannak a tuladen uray kaskasano.’
Ania ti sumagmamano kadagiti galad ti Dios a mabalintayo a tuladen? Sumungbat dagiti konteksto. Imutektekam ta sakbay nga imbalakad ni Pablo a tuladentayo ti Dios, rinugianna dayta babaen ti sao a “gapuna.” Daytoy a termino ket kasilpo ti immun-una a bersikulo a nangdakamat iti kinamanangngaasi, nadungngo a pannakipagrikna, ken pammakawan. (Efeso 4:32; 5:1) Sa iti bersikulo kalpasan ti balakad a tuladentayo ti Dios, indagadag ni Pablo kadagiti Kristiano a salimetmetanda ti kita ti panagbiag a nabuyogan iti ayat a di managimbubukodan. (Efeso 5:2) Wen, no iti panangipakita iti kinamanangngaasi, panangyebkas iti nadungngo a pannakipagrikna, sibubulos a panangpakawan, ken panangipakita iti ayat, adda iti sanguanantayo ti kasayaatan a pagwadan—ni Jehova a Dios.
Apay a kayattayo a tuladen ti Dios? Imutektekam ti napuersa a pammabileg nga ipaspasimudaag ti sasao ni Pablo nga: “Agbalinkayo a tumutulad iti Dios, kas annak a dungdungnguen.” Saan kadi a makagutugot dayta iti rikna? Ni Jehova matmatanna dagiti adipenna a kas annak a dungdungnguenna. No kasano a ti maysa nga ubing kayatna ti agbalin a kas iti amana, dagiti pudno a Kristiano aramidenda ti amin a kabaelanda a mangtulad iti nailangitan nga Amada.
Ni Jehova dina piliten dagiti tattao a mangtulad kenkuana. Kinapudnona, pinadayawannatayo pay ketdi babaen ti panangtedna kadatayo iti wayawaya nga agpili. Gapuna, adda kenka no tuladem ti Dios wenno saan. (Deuteronomio 30:19, 20) Ngem dimo koma liplipatan nga addaanka iti kapasidad a mangiparangarang kadagiti nadiosan a galad. Siempre, tapno matuladmo ti Dios, masapul nga am-ammuem pay nga umuna ti personalidadna. Ti Biblia tulongannaka a mangadal iti amin a galad ken dana ti Dios, daydiay tultuladen ita ti minilion a tattao gapu kadagiti di maartapan a galadna.
[Footnote]
a Ipamatmat ti Colosas 3:9, 10 a ti panagbalin a kaladladawan ti Dios ket mainaig kadagiti personal a galad. Maidagadag kadagidiay agtarigagay a mangay-ayo iti Dios a kawesanda ti bagbagida “iti baro a personalidad,” a “mapabpabaro maitunos iti ladawan Daydiay [Dios a] nangparsua iti dayta.”