Saludsod Dagiti Agbasbasa
Apay nga Ituktukon ti Dios Kadagiti Tattao ti Sagut a Biag nga Agnanayon?
▪ Kunaen ti Biblia nga ipapaayannatayo ti Dios iti gundaway a maaddaan iti “agnanayon a biag.” (Juan 6:40) Ngem ania ti nangtignay iti Dios a mangipaay ti kasta a namnama? Maigapu kadi iti kinahustisiana?
Ti kinahustisia ramanenna ti padapada ken nalinteg a panangtrato kadagiti sabsabali. Talaga kadi a maikaritayo iti biag? Saan. Kuna ti Biblia: “Awan ti tao a nalinteg iti daga nga agtultuloy nga agaramid iti naimbag ket saan nga agbasol.” (Eclesiastes 7:20) Adda supapak ti basol. Pinakdaaran ti Dios ti immuna a tao, ni Adan, nga iti aldaw a panagbasolna, di bumurong a matayto. (Genesis 2:17) Idi agangay, napaltiingan ni apostol Pablo a mangisurat: “Dagiti isupapak ti basol isu ti ipapatay.” (Roma 6:23) Isu a no amin a kaputotan ni Adan ket maikari iti ipapatay, apay ngarud nga ituktukon ti Dios ti agnanayon a biag?
Ti tukon nga agnanayon a biag ket “awan bayadna a sagut.” Ebkas dayta ti naindaklan ken sapasap a panagayat ti Dios ken ti di kaikarian a kinamanangngaasina. Kuna ti Biblia: “Ta amin nagbasol ken agkurang iti dayag ti Dios, ket kas awan bayadna a sagut a maidekdeklarada a nalinteg babaen ti di kaikarian a kinamanangngaasina baeten iti pannakaluk-at babaen ti subbot nga imbayad ni Kristo Jesus.”—Roma 3:23, 24.
Nupay maikaritayo amin a matay, inkeddeng ti Dios nga ipaayanna iti agnanayon a biag dagidiay amin nga agayat kenkuana. Manangidumduma kadi ti Dios? Kunaen ti Biblia: “Anianto ti kunaentayo, ngarud? Adda aya di kinahustisia iti Dios? Saan koma a pulos agbalin a kasta! Ta kunana ken Moises: ‘Kaasiakto ti siasinoman a kaasiak, ket ipakitakto ti panangngaasi iti siasinoman a pangipakitaak iti panangngaasi.’. . . Siasinoka, ngarud, a pudpudno tapno sungbatam ti Dios?”—Roma 9:14-20.
Iti dadduma a paset ti lubong, ti maysa a hues wenno nangato nga opisial ti gobierno mabalin a pakawanenna ti kriminal a nasentensiaan iti nadagsen a dusa. No situtulok ti kriminal a mangaramid iti kalikaguman ti hues ken ipakitana a balbaliwanna ti kababalinna, mabalin nga ikeddeng ti hues wenno presidente a mapalag-anan ti sentensiana wenno mawayawayaan pay ketdi. Maysa dayta nga ebkas ti di kaikarian a kinamanangngaasi.
Umasping iti dayta, mabalin nga ikeddeng ni Jehova a saannan nga ipataw ti pannusa a maiparbeng iti amin a nagbasol. Gapu iti ayatna, mabalinna nga ipaay ti agnanayon a biag kadagidiay agayat kenkuana ken mangannurot kadagiti pagalagadanna. Kuna ti Biblia: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”—Aramid 10:34, 35.
Ti panangibaonna iti Anakna tapno agsagaba ken matay para kadatayo ti kadakkelan nga ebkas ti ayat ni Jehova. Kinuna ni Jesus maipapan iti Amana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”—Juan 3:16.
Anamongan ni Jehova ti amin a pudno nga agayat kenkuana ken mangaramid iti pagayatanna, aniaman ti nalikudanda. Gapuna, ti namnama nga agnanayon a biag ket maysa a kangrunaan nga ebkas ti di kaikarian a kinamanangngaasi ken ebkas ti natan-ok nga ayat ti Dios.
[Blurb iti panid 29]
Maysa dayta a kangrunaan nga ebkas ti di kaikarian a kinamanangngaasi ken ebkas ti natan-ok nga ayat