Saludsod Dagiti Agbasbasa
Ni Jesus Kadi ti Miguel nga Arkanghel?
▪ Wen, ti simple a sungbat. Gagangay iti amin a kultura ti maaddaan iti nasursurok ngem maysa a nagan. Kasta met laeng no maipapan kadagiti nagan iti Biblia. Kas pagarigan, ti patriarka a ni Jacob ket napanaganan met iti Israel. (Genesis 35:10) Ni apostol Pedro ket naawagan iti lima pay a nagan—Simeon, Simon, Pedro, Cefas, ken Simon Pedro. (Mateo 10:2; 16:16; Juan 1:42; Aramid 15:7, 14) Kasano a masiguradotayo a Miguel ti sabali pay a nagan ni Jesus? Usigem dagiti sumaganad a pammaneknek ti Kasuratan.
Naminlima a nadakamat iti Biblia ti mannakabalin nga espiritu a parsua a ni Miguel. Tallo kadagita ti nadakamat iti libro a Daniel. Iti Daniel 10:13, 21, mabasatayo nga adda maysa a naibaon nga anghel nga inispal ni Miguel, a naawagan iti “maysa kadagiti kangrunaan a prinsipe” ken “ti prinsipeyo.” Sumaganad, iti Daniel 12:1, naammuantayo nga iti tiempo ti panungpalan, “tumakderto ni Miguel, ti dakkel a prinsipe nga agtaktakder maigapu iti annak ti ilim.”
Nadakamat pay ni Miguel iti Apocalipsis 12:7. Nadeskribir sadiay ni “Miguel ken dagiti anghelna” a mangisaysayangkat iti napateg a gubat nga agresulta iti pannakapaksiat ni Satanas a Diablo ken dagiti nadangkes nga anghel manipud langit.
Imutektekam ta iti tunggal kasasaad a nadakamat, nailadawan ni Miguel kas mannakigubat nga anghel a makidangdangadang ken mangsalsalaknib iti ili ti Dios, ken makidangdangadang pay ketdi ken Satanas a kangrunaan a kabusor ni Jehova.
Iti Judas bersikulo 9, naawagan ni Miguel iti “ti arkanghel.” Ti “ark” kaipapananna “kangrunaan” wenno “panguluen,” ken ti sao nga “arkanghel” a nadakamat iti Biblia kanayon a tukoyenna ti maysa laeng a persona. Ti kakaisuna a bersikulo a nakadakamatan pay ti arkanghel ket ti 1 Tesalonica 4:16, a ditoy dineskribir ni Pablo ni napagungar a Jesus, a kunkunana: “Ti Apo [Jesus] a mismo bumabanto manipud langit buyogen ti agbilbilin nga awag, buyogen ti timek ti maysa nga arkanghel ken buyogen ti trumpeta ti Dios.” Ni Jesu-Kristo mismo ket nabigbig ngarud ditoy kas ti arkanghel, wenno panguluen nga anghel.
Maibasar iti nailawlawag, ania ti konklusiontayo? Ni Jesus ti Miguel nga arkanghel. Dagita a nagan—ti Miguel (a kaipapananna “Siasino ti kas iti Dios?”) ken ti Jesus (a kaipapananna “Ni Jehova ti Pakaisalakanan”)—agpada nga iturongda ti atensiontayo iti akemna kas daydiay kangrunaan a manangitandudo iti kinasoberano ti Dios. Kunaen ti Filipos 2:9: “Isu [ni naipadayag a Jesus] intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan.”
Napateg a maammuantayo a ti pannakaipasngay ni Jesus ditoy daga ket saan nga isu ti nangrugian ti biagna. Sakbay a naipasngay ni Jesus, simmarungkar ti maysa nga anghel a nangipakaammo a mangipasngayto ni Maria iti maladaga babaen ti nasantuan nga espiritu ket panaganannanto ti ubing iti Jesus. (Lucas 1:31) Bayat ti ministeriona, masansan a dinakamat ni Jesus ti biagna sakbay a nagbalin a tao.—Juan 3:13; 8:23, 58.
Ni ngarud Miguel nga arkanghel ket isu ni Jesus sakbay a nagbalin a tao. Kalpasan ti pannakapagungar ken panagsublina idiay langit, intultuloy ni Jesus ti panagserbina kas Miguel, ti panguluen nga anghel maipaay “iti dayag ti Dios nga Ama.”—Filipos 2:11.