Saandan a Pagbutngan ti Panungpalan
IDI arinunos ti dekada 1970, namati da Gary ken Karen nga asidegen ti panungpalan ti lubong. Isu a manipud iti siudad, immakarda iti away ket inkeddengda ti agbalin a naan-anay nga independiente. Kayatda ti makalasat.
Tapno maaddaanda iti kasapulan a pannakasanay, gimmatangda kadagiti libro, timmabunoda kadagiti klase ken seminar, ken nagkonsultada iti adu a tattao. Nagmulada iti natnateng ken 50 a babassit nga agbunga a kaykayo. Nagurnongda kadagiti bukbukel ken alikamen. Inadalda no kasano ti mangpadakkel iti mula ken mangpreserba iti taraon. Maysa a gayyem ti nangisuro kadakuada nga agparti ken mangpreserba iti karne. Inadal ni Karen no kasano nga ilasin dagiti mula ken ramut iti bakir a mabalin a kanen no bilang ta maibusanda iti taraon. Inadal met ni Gary no kasano ti mangpataud iti gas manipud kadagiti mais, mangaramid iti metal a dalikan a masungrodan iti kayo, ken mangbangon iti balay a saan nga agpannuray iti serbisio ti padanum, koriente, ken dadduma pay.
“Gapu ta nagdakes ti kasasaad ti lubong, impagarupko idin nga asidegen nga agpatingga ti sibilisasion,” kuna ni Karen. Inlawlawag ni Gary: “Kas iti dadduma nga agkabannuag, nakiramanak iti bunggoy dagiti aktibista a mangikagkagumaan a mangrisut iti panangidumduma iti puli, gubat idiay Vietnam, ken panagkunniber. Ngem naupayak met la a dagus. Iti panagkitak, agngangabiten a madadael ti sangatauan.”
Kinuna ni Gary: “Maysa a rabii, naiwayaak a basaen ti Biblia manipud Mateo agingga iti Apocalipsis. Iti simmaganad nga uppat a rabii, in-inut a binasak manen dayta. Iti maikalima nga agsapa, imbagak ken Karen: ‘Agbibiagtayon iti maudi nga al-aldaw. Asidegen nga agtignay ti Dios tapno dalusanna ti daga. Nasken a birokenta dagiti maisalakan.’” Rinugian da Gary ken Karen ti mapan iti nagduduma a relihion, a sinapsapulda dagiti tattao a mayat nga agsagana tapno makalasatda iti panungpalan.
Di nagbayag, maysa a Saksi ni Jehova ti nagtuktok iti ridawda, ket rinugianna ida nga iyadalan iti Biblia. “Maragsakanak unay,” malagip ni Karen, “gapu ta talaga a nailawlawag kaniak ti Kasuratan. Nabayagen a sapsapulek ti kinapudno maipapan iti tiempo ti panungpalan, ket nabirokak met laengen kamaudiananna. Adda sigurado a pangnamnamaan iti masanguanan. Ngem napatpateg pay, mabalinkon ti maaddaan iti nasinged a relasion iti nailangitan nga Amak, ti Namarsua ken Dios iti uniberso.”
Kinuna ni Gary: “Naaddaanak iti pudpudno a panggep iti biag. Idi rinugiak ti nagadal iti Biblia, saankon a kayat nga isardeng dayta. Binasak dagiti padto ti Biblia, inusigko dagiti pammaneknek a matungpal dayta, ket nakombinsirak nga asidegen nga agtignay ti Dios. Napanunotko a ‘masapul nga agsagana dagiti tattao, saan a maigapu iti didigra, no di ket maipaay iti biag a tarigagayan ti Dios a magun-odantayo.’” Naaddaan da Gary ken Karen iti positibo a panangmatmat iti masanguanan. Imbes a pagdandanaganda ti panungpalan ti lubong, naaddaanda iti panagtalek nga ikkaten ti Dios dagiti parikut a mangparparigat iti sangatauan ken pagbalinenna a paraiso ti daga.
Ania ti ar-aramiden da Gary ken Karen iti nasurok a 25 a tawen itan? Kuna ni Karen: “Agtultuloy a pabpabilgek ti panagayatko ken Jehova a Dios ken ti pammatik kenkuana, ken tultulongak ti sabsabali tapno aramidenda met dayta. Agtintinnulongkami ken Gary bayat a tagtaginayonenmi ti kinabileg ken panagkaykaysa ti pamiliami nga agdayaw iti Dios. Ikagkagumaanmi ti agtalinaed nga organisado, ken pagregreggetanmi a taginayonen a simple ti panagbiagmi tapno maipamaysami ti tumulong kadagiti sabsabali.”
Innayon ni Gary: “Kanayon nga ikarkararagko ti iyaay ti Pagarian ti Dios a mangpabang-ar iti minilmilion a tattao. Iti tunggal gundaway nga ikasabak ti naimbag a damag ti Pagarian, ikararagko nga adda koma uray maysa laeng a tao a pangiranudak iti namnama manipud iti Biblia. Iti nasurok a 25 a tawenen, siaasi a sinungbatan ni Jehova dayta a kararagko. Patienmi ken Karen nga asidegen nga ipatungpal ni Jehova dagiti dadakkel a panagbalbaliw ditoy daga, ngem saanmin a pagbutngan ti panungpalan.”—Mateo 6:9, 10; 2 Pedro 3:11, 12.
[Ladawan iti panid 9]
Maragragsakan ita da Gary ken Karen a tumultulong iti sabsabali a maaddaan iti namnama babaen ti mensahe ti Biblia