Addaan Kadi ti Isuamin iti Padapada a Gundaway a Mangam-ammo iti Dios?

Idi naisaludsod ken Jesus no ania ti kapatgan a bilin, kinunana: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) Ngem sakbay a masursuro dagiti tattao nga ayaten ti Dios, nasken a gun-odenda ti umiso a pannakaammo maipapan kenkuana. (Juan 17:3) Addaan kadi ti isuamin iti gundaway a manggun-od iti dayta a pannakaammo?

Ti Biblia ti kangrunaan a gubuayan ti pannakaammo maipapan iti Dios. (2 Timoteo 3:16) Adu ti agnanaed kadagiti komunidad a mabalinda ti maaddaan iti Biblia. Mabalin a naulit-ulit metten a naparegtada a gumun-od iti umiso a pannakaammo maipapan iti Dios babaen ti personal a panagadal iti Biblia. (Mateo 28:19) Dadduma ti pinadakkel dagiti naayat a Kristiano a nagannakda, nga inaldaw a nangisuro kadakuada iti maipapan iti Dios.​—Deuteronomio 6:6, 7; Efeso 6:4.

Nupay kasta, adda met dagidiay saan a nasayaat ti kasasaadda. Dadduma ti nagtaud iti pamilia a dagiti nagannak saan a nangipakita iti nainkasigudan a panagayat kadagiti annakda. (2 Timoteo 3:1-5) Dagiti dimmakkel iti kasta a kasasaad mabalin a saanda nga ibilang ti Dios a maysa a naayat a nailangitan nga Ama. Adu ti saan a naaddaan iti nangato nga adal, isu a dida kabaelan a basaen ti Biblia. Iti sabali a bangir, adda met dagidiay nabulsek ti pampanunotda gapu kadagiti palso a pannursuro ti relihion, wenno agbibiagda kadagiti pamilia, komunidad, wenno pagilian a maiparit ti panagadal iti kinapudno a linaon ti Biblia. (2 Corinto 4:4) Ti kadi kasasaad dagita nga indibidual ti manglapped kadakuada a maaddaan iti gundaway a mangadal iti maipapan iti Dios ken mangayat kenkuana?

Imbaga a mismo ni Jesus a dagiti karit a sangsanguen dagiti tattao ti makagapu a marigatanda nga agayat ken agtulnog iti Dios. (Mateo 19:23, 24) Nupay kasta, impalagip ni Jesus kadagiti adalanna nga uray no adda dagiti lapped a kasla di mapagballigian ti tao, “iti Dios amin a bambanag mabalin.”​—Mateo 19:25, 26.

Usigem dagiti sumaganad a kinapudno: Impasigurado ni Jehova a Dios a ti Saona a ti Biblia ti kasaknapan a libro a naiwaras iti amin a tiempo. Impadto ti Biblia a maikasabanto iti “intero a mapagnaedan a daga” ti naimbag a damag maipapan iti Dios ken ti panggepna para iti daga. (Mateo 24:14) Dagiti Saksi ni Jehova ikaskasabada ita ti naimbag a damag iti nasurok a 230 a pagilian ken mangipabpablaakda kadagiti naibatay iti Biblia a literatura iti agarup 500 a lenguahe. Uray dagiti awanan gundaway nga agbasa iti Biblia kaskasdi nga adu ti maammuanda maipapan iti pudno a Dios babaen ti panangpaliiwda kadagiti bambanag nga inaramidna.​—Roma 1:20.

Kanayonanna, kuna ti Sao ti Dios: “Amin a puspuso sukimaten ni Jehova, ket tunggal pagannayasan ti pampanunot mailasinna. No birokem, ipalubosnanto nga isu masarakam.” (1 Cronicas 28:9) Isu a nupay saan nga ikari ni Jehova a maaddaan ti tunggal indibidual iti padapada a gundaway, siguraduenna a maaddaan iti gundaway ti isuamin a napudno a tattao. Siguraduenna pay a dagiti pimmusay a di pulos nakaam-ammo kenkuana maaddaandanto iti gundaway babaen ti pannakapagungarda iti nalinteg a baro a lubong.​—Aramid 24:15.