Umadanika iti Dios

Pinadayawannatayo Babaen iti Wayawaya nga Agpili

2 AR-ARI 18:1-7

RUMBENG a mangipakita dagiti nagannak iti nasayaat nga ulidan kadagiti annakda. Dayta ti makatulong iti maysa nga ubing a mangpatanor kadagiti nagsasayaat a galad ken mangaramid kadagiti nainsiriban a desision iti biag. Ngem nakalkaldaang ta adu a nagannak ti saan a mangipapaay iti nasayaat nga ulidan. Kayat kadi a sawen dayta a saanen nga agballigi dagiti annak a kasta ti kasasaadda? Ti sungbat ket ibatad daytoy a mapangnamnamaan a kinapudno​—ni Jehova a Dios pinadayawanna ti tunggal maysa kadatayo babaen ti sagutna kadatayo a wayawaya nga agpili. Usigem ti kapadasan ni Ezekias, kas mabasa iti 2 Ar-ari 18:1-7.

Ni Ezekias ket “anak ni Acaz nga ari ti Juda.” (Bersikulo 1) Indauluan ni Acaz dagiti iturayanna a tumallikud iti nasin-aw a panagdayaw ken Jehova. Nakipaset daytoy a dakes nga ari iti panagdaydayaw ken Baal, a pakairamanan ti ritual a panangidaton kadagiti tattao. Pinapatayna ti maysa wenno ad-adu pay a kakabsat ni Ezekias. Inserrana dagiti ridaw ti templo ken “nangaramid kadagiti altar a maipaay kenkuana iti tunggal suli idiay Jerusalem. . . . Pinagrurodna ni Jehova.” (2 Cronicas 28: 3, 24, 25) Nabatad a nakadakdakes ti ama ni Ezekias. Ngem kayat kadi a sawen dayta nga agbalin met a dakes ni Ezekias?

Apaman a simmukat ni Ezekias kas ari, saanna a tinulad ti dakes nga ulidan ni amana. Ni Ezekias “intuloyna nga aramiden no ania ti umiso kadagiti mata ni Jehova.” (Bersikulo 3) Nagtalek ni Ezekias ken Jehova, ket “awan idin ti kas kenkuana iti amin nga ar-ari ti Juda.” (Bersikulo 5) Iti umuna a tawen ti panagturayna kas agtutubo nga ari, rinugian ni Ezekias nga itandudo ti pudno a panagdayaw a nagresulta iti pannakaikkat dagiti nangato a disso, a pagdaydayawan kadagiti palso a didios. Naluktan manen ti templo, ket naisubli ti nasin-aw a panagdayaw. (Bersikulo 4; 2 Cronicas 29:1-3, 27-31) Ni Ezekias “intultuloyna ti kimpet ken Jehova . . . , ket adda idi kenkuana ni Jehova.”​—Bersikulo 6, 7.

Ania ti nakatulong ken Ezekias tapno saan a maimpluensiaan iti kinadakes ni amana? Nupay bassit laeng ti ammotayo maipapan iti inana a ni Abias, posible ngata a nangipakita iti nasayaat nga ulidan iti anakna? Idi agtutubo pay ni prinsipe Ezekias, nakaimpluensia ngata kenkuana ti nasayaat nga ulidan ni Isaias, a nangrugi a nagipadto sakbay pay a naipasngay ni Ezekias?a Awan ti ibaga ti Biblia maipapan iti dayta. Aniaman ti napasamak, sigurado daytoy: Pinili ni Ezekias ti wagas ti biag a naiduma ken amana.

Ti ulidan ni Ezekias ket makaparegta iti siasinoman a dimmakkel iti sidong dagiti di mapagwadan a nagannak. Saanen a mabaliwan ti napalabas; saantayo met a malipatan dagiti nasaem a kapadasan iti napalabas. Ngem saan a kayat a sawen dayta a mapaaytayo nga agaramid iti naimbag. Mabalintay ita ti makaaramid kadagiti desision nga agresulta iti naragsak a masanguanan. Kas ken Ezekias, mabalintay a pilien nga ayaten ken dayawen ti pudno a Dios a ni Jehova. Mangitunda dayta iti makapnek a biag ita ken agnanayon a biag iti baro a lubong ti Dios. (2 Pedro 3:13; Apocalipsis 21:3, 4) Anian a yamantayo iti naayat a Dios a nangpadayaw iti tunggal maysa kadatayo babaen ti nagpateg a sagutna kadatayo a wayawaya nga agpili!

[Footnote]