Kararag

1 Apay?

KARARAG. Maysa dayta kadagiti manmano a topiko iti Biblia a paginteresan ti adu. Ammuem dagiti pito a gagangay a saludsod maipapan iti kararag; kalpasanna, usigentayo dagiti sungbat nga ipaay ti Biblia. Dagitoy nga artikulo ket nairanta a tumulong kenka nga agkararag​—no kasano a rugiam ti agkararag wenno kasano a pasayaatem ti kararagmo.

AGKARKARARAG dagiti tattao iti intero a lubong, aniaman ti kultura ken relihionda. Agkararagda kas indibidual wenno kas grupo. Agkararagda kadagiti simbaan, templo, sinagoga, moske, wenno kadagiti santuario. Agusarda kadagiti pagparintumengan nga ikamen, rosario, ruedo a paglualo (prayer wheel), imahen, libro ti kararag, wenno karkararag a naisurat kadagiti babassit a nakasab-it a lapida.

Ti panagkararag ti maysa a nakaidumaan ti tao iti dadduma a parsua ditoy daga. Agpayso nga adu ti nakaipadaantayo kadagiti animal. Kas kadakuada, kasapulantayo ti taraon, angin, ken danum. Mayanak, agbiag, ken mataytayo met. (Eclesiastes 3:19) Ngem tattao laeng ti agkararag. Apay?

Nalabit, ti kasimplean a sungbat ket gapu ta masapul nga aramidentayo dayta. Ibilang pay ketdi ti kaaduan a ti panagkararag ket maysa a pamay-an ti pannakikomunikar kadagiti espiritu, kadagiti banag a matmatanda a manayon ken nasantuan wenno sagrado. Ibatad ti Biblia a naparsuatayo nga agtarigagay kadagiti kasta a banag. (Eclesiastes 3:11) Kinuna idi ni Jesu-Kristo: “Naragsak dagidiay sipapanunot iti naespirituan a kasapulanda.”​—Mateo 5:3.

Addaantayo la ketdi iti ‘naespirituan a kasapulan’ kas ipakita ti nagadu a narelihiosuan a pasdek ken alikamen iti panagkararag, kasta met ti adu nga oras a busbusbosentayo iti panagkararag. Siempre, adda bukod a pamay-an ti dadduma a mangpennek iti naespirituan a kasapulanda, idinto nga agpannuray ti dadduma iti padada a tao. Ngem saan kadi a bassit laeng ti maitulong ti padatayo a tao? Nakapuy, ababa ti biag, ken limitado ti pannakaawattayo. Ti laeng makaipaay iti kasapulantayo ket daydiay manayon, daydiay nasirsirib, ken nabilbileg ngem datayo. Ngem ania dagitoy a naespirituan a kasapulan a mangtigtignay kadatayo nga agkararag?

Usigem daytoy: Tartarigagayam kadi ti panangiwanwan, sirib, wenno sungbat dagiti saludsod a kasla di matukod ti panunot ti tao? Adda kadi gundaway a kasapulam ti liwliwa gapu iti ipapatay ti ipatpategmo, wenno ti pannakaiwanwan gapu iti pakaburiboram a masapul a desisionam, wenno ti pammakawan gapu iti basol a mangsidsidir iti konsiensiam?

Sigun iti Biblia, maitutop nga ikararag dagita. No maipapan iti panagkararag, ti Biblia ti kangrunaan a libro a mapagpannurayan. Naglaon dayta iti karkararag ti adu a matalek a lallaki ken babbai. Nagkararagda tapno maliwliwa, maiwanwan, mapakawan, ken tapno masungbatan dagiti karirikutan a saludsodda.​—Salmo 23:3; 71:21; Daniel 9:4, 5, 19; Habakuk 1:3.

Nagduduma dagiti kararagda, ngem adda nagpapadaanda. Tunggal maysa a nagkararag ket addaan iti nakapatpateg a tulbek iti naballigi a panagkararag​—ammoda no asino ti rumbeng a pakaiturongan dagiti kararag. Dayta ti masansan laklaksiden wenno saan a maamiris dagiti tattao ita.