Saludsod Dagiti Agbasbasa
Apay a Nagaramat ni Satanas iti Uleg idi Nakisarita ken Eva?
▪ Mabalin nga umanamongka iti nausig iti panid 8, a ni Satanas ti adda iti likudan ti uleg a nakisarita ken Eva. Daytoy a talaga ti isursuro ti Biblia. Ngem mabalin a maisaludsodmo, ‘Apay a masapul nga agusar iti uleg ti maysa a mannakabalin nga espiritu?’
Iti Biblia, nadakamat dagiti taktika ni Satanas kas “pangallilaw,” ket mapaneknekan dayta iti napasamak idiay Eden. (Efeso 6:11) Ti panagsao ti maysa nga animal idiay Eden ket saan a parparbo. Nabatad a pagarigan dayta ti nasikap a pamay-an a nairanta a mangallukoy kadagiti tattao tapno umikayda iti Dios. Kasano?
Siaannad a pinili ni Satanas ti biktimana. Ni Eva idi ti kaubingan a nasaririt a parsua iti uniberso. Inallilaw ken inallukoyna ti babai gapu ta awanan pay iti kapadasan. Nagpammarang ni Satanas kas uleg, ti nakaan-annad a parsua, iti kasta, sisisikap a mailemmengna ti ambisioso a panggepna. (Genesis 3:1) Kitaem met ti naaramidanna idi pinagparangna nga agsasao ti uleg.
Umuna, naala ni Satanas ti atension ni Eva. Ammo ni Eva a saan nga agsao dagiti uleg ken pinanaganan ni lakayna ti amin nga animal babaen ti naannad a panangadalna kadagita. (Genesis 2:19) Sigurado a napaliiw met ni Eva daytoy naannad a parsua. Gapuna, natignay ti panagusioso ni Eva, ket inturongna ti atensionna iti banag a naiparit kenkuana iti intero a hardin. Maikadua, ania ti nalabit panunoten ni Eva no apay a ti uleg adda iti sanga ti maiparit a kayo? Saan ngata a napanunotna a daytoy a nanumo ken di makasao a parsua ket nangan iti bunga dayta isu a nakapagsao? No kasta ti epekto dayta a bunga iti maysa nga uleg, ania met ngata ti epektona kenkuana? Saantayo a masigurado no ania ti napanunot ni Eva ken no nangan ti uleg iti bunga. Ngem ammotayo nga idi imbaga ti uleg a ti bunga ti mamagbalin ken Eva a “kas iti Dios,” saanen a nagduadua ti babai ket pinatina dayta a kinaulbod.
Adu met ti naaramidan ti sasao nga inaramat ni Satanas. Pinagduaduana ni Eva ket kinunana a ti Dios ipapaidamna ti banag a naimbag ken kedkednganna ti wayawaya ti tao. Agballigi ti gandat ni Satanas no suroten ni Eva ti bukodna a pagayatan, ket tallikudanna ti Dios a nangted iti amin nga adda kenkuana. (Genesis 3:4, 5) Nakalkaldaang ta nagkurri ti taktika ni Satanas ta saan a tinaginayon da Eva ken Adan ti maiparbeng a panagayat ken panangapresiarda ken Jehova. Saan kadi a kasta met laeng a kinamanagimbubukodan ken panagrasrason ti itantandudo ita ni Satanas?
Ngem ania ti motibo ni Satanas? Ania ti kayatna a mapasamak? Idiay Eden, ginandatna nga ilemmeng ti kinasiasinona ken ti motibona. Ngem idi agangay, impalgakna met laeng dayta. Idi sinulisogna ni Jesus, ammona nga awan mamaay ti panagpammarang. Isu a direkta a sinugsoganna ni Jesus: “Agruknoyka ken mangaramidka iti maysa a tignay a panagdayaw kaniak.” (Mateo 4:9) Nabatad a nabayagen nga agim-imon ni Satanas iti dayaw a maipapaay ken Jehova a Dios. Aramidenna ti amin a kabaelanna a mangisiasi ken manglapped iti panagdayaw ti tao iti Dios. Pagay-ayatna a dadaelen ti kinatarnaw ti tao iti Dios.
Nabatad nga ipalgak ti Biblia a nalaing a mangallilaw ni Satanas tapno maallukoyna dagiti biktimana. Ngem saantayon a maallilaw a kas ken Eva, ta “saantayo nga ignorante kadagiti gakatna.”—2 Corinto 2:11.