Nakapatpateg a Padto
“Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”—MATEO 24:14.
UMANAMONG dagiti eskolar ti Biblia a nakapatpateg dayta a bersikulo ta deskribirenna ti trabaho a maisaknap iti intero a lubong. Ipakitana met no ania a trabaho ti rumbeng nga aramiden dagiti Kristiano—ti panangasaba a mangiwaragawag iti nakapatpateg ken nakasaksaknap a pagteng nga inawagan ni Jesus iti “panungpalan.”
Matungtungpal dayta a padto iti kaaldawantayo. Maseknanka ta adda awis ken pakdaar a linaon dayta a naimbag a damag. Awatem man wenno saan ti Pagarian ti Dios, apektaranna ti mismo a biagmo.
Usigem ti konteksto. Sumagmamano nga aldaw sakbay a nailansa ni Jesus, immay kenkuana dagiti adalanna ket nagdamagda maipapan iti masanguanan. Interesadoda a mangammo iti pannakaipasdek ti Pagarian ti Dios, a masansan idi a dakamaten ni Jesus. Kayatda met nga ammuen ti maipapan iti “panungpalan ti sistema ti bambanag,” wenno sigun iti sabali a patarus, “ti panungpalan ti lubong.”—Mateo 24:3, Ti Baro a Naimbag a Damag Biblia.
Kas sungbat ni Jesus, impadtona nga addanto dagiti gubat, bisin, angol, ken napipigsa a ginggined nga agraira iti intero a lubong. Kinunana pay nga umadunto ti kinadakes, dagiti palso a mannursuro iyaw-awandanto ti adu, ken magurgura ken maidadanesto dagiti pudno a Kristiano. Amin dagitoy ket dakes a damag.—Mateo 24:4-13; Lucas 21:11.
Ngem adda met naimbag a damag. Simmaruno nga imbaga ni Jesus dagiti sasao a nadakamat iti ngato, sasao a namagpanunot ken nangted iti namnama kadagiti tattao iti adu a siglo. Nupay umanamong dagiti tattao a napateg ti sasao ni Jesus, agsusupadi ti kapanunotanda no ania ti kaipapananna. Ania a talaga daytoy naimbag a damag? Ania ti Pagarian? Kaano a matungpal daytoy a padto ken siasino dagiti mangtungpal? Ken ania “ti panungpalan”? Ammuentayo.
[Ladawan iti panid 2, 3]
Kopia ti Washington Manuscript ti Uppat nga Ebanghelio. naitampok ti Mateo 24:14
[Credit Line]
Manipud iti libro a Facsimile of the Washington Manuscript of the Four Gospels iti Freer Collection 1912