4 Mangidumduma ti Dios​—Pudno Kadi?

Ti mabalin a nangngegmon: “Konkontrolen ti Dios daytoy a lubong, ket pagayatanna ti amin a mapaspasamak. Basol ngarud ti Dios no apay a napno ti lubong iti panangidumduma, kinaawan hustisia, ken panangirurumen.”

Ti isursuro ti Biblia: Saan a gapuanan ti Dios ti kinaawan hustisia ditoy lubong. Kuna ti Biblia maipapan ken Jehova: “Naan-anay ti aramidna, ta amin a daldalanna kinahustisia.”​—Deuteronomio 32:4.

Naparabur ti Dios iti amin a tao, agraman dagidiay kasla di maikari. Kas pagarigan, “pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mateo 5:45) Patas ti panangtratona iti amin a puli ken kultura ti tao, sigun iti Aramid 10:34, 35: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”

Nagtaudan ngarud ti di kinahustisia? Adu a tattao ti mangidumduma, a saanda a tultuladen ti kinahustisia ti Dios. (Deuteronomio 32:5) Ipakita met ti Biblia a palpalubosan ti Dios ti kabusorna, ti Diablo, a mangituray iti lubong.a (1 Juan 5:19) Ngem asidegen nga agpatingga ti panangipalubos ti Dios iti turay nga awanan hustisia. Nakasaganan ti aramatenna a ‘mangdadael kadagiti aramid ti Diablo.’​—1 Juan 3:8.

Ti maitulong kenka ti panangammom iti kinapudno: Mabalin a mariribukanka gapu iti agtultuloy a maipadpadamag a kurapsion, panangirurumen, ken kinaawan hustisia. No maammuam ti makagapu, maawatam met no apay a nariribuk dagiti agdama a kasasaad ken apay a kanayon a mapaay ti panagregget ti tao a mangpasayaat iti lubong. (Salmo 146:3) Imbes nga ikagumaam ti mangaramid iti temporario a panagbalbaliw, mangnamnamaka ketdi kadagiti nagsayaat a kari ti Dios.​—Apocalipsis 21:3, 4.

Ti pannakaammo iti agpayso a nagtaudan ti kinaawan hustisia ket makatulong kadatayo nangnangruna no dumteng ti rigat. No di nainkalintegan ti pannakatratotayo, mabalin nga iyararawtayo iti Dios ti kinuna ni Habakuk: “Mabibineg ti linteg, ket ti hustisia saan a pulos rummuar.” (Habakuk 1:4) Ti Dios saanna a binabalaw ni Habakuk gapu iti kasta nga imbagana. Imbes ketdi, impasigurado kenkuana ti Dios a nangikeddeng iti tiempo a mangilinteg iti bambanag ken tinulonganna ni Habakuk nga agbalin a naragsak uray no addaan iti parikut. (Habakuk 2:2-4; 3:17, 18) Kasta met, no agtalekka iti kari ti Dios nga ilintegnanto ti kinaawan hustisia, agbalin a natalingenngen ken natalna ti panunotmo iti daytoy mangidumduma a lubong.

[Footnote]

[Blurb iti panid 7]

Talaga kadi a basol ti Dios ti panagsagaba ken kinaawan hustisia?

[Picture Credit Line iti panid 7]

© Sven Torfinn/Panos Pictures