‘Uray La Mapataliaw Dagiti Tattao Kaniak’

Idi simmangpet idiay Louisville, Kentucky, U.S.A. ti amin-tiempo a mangaskasaba a ni Charlotte White, pinagdidinnamaganda gapu iti guyguyodenna a de pilid a maleta.

TAWEN 1908 idi. Sigurado a mapataliaw dagiti umili ken Kabsat White gapu iti baro nga imbension​—ti Dawn-Mobile. “Pagsasaritaan dayta dagiti tattao ta uray la tumaliawda kaniak,” kunana.

Nakita dagiti Estudiante ti Biblia, kas awag idi kadagiti Saksi ni Jehova, a masapul nga iranudda dagiti napateg a kinapudno a nasursuroda iti naanep a panagadalda iti Kasuratan. Adu ti naaddaan iti pannakaammo iti Biblia babaen ti serye dagiti libro a napauluan iti Millennial Dawn (naawagan idi agangay iti Studies in the Scriptures). Dagiti Kristiano a situtulok ken makabael nga agbiahe mapanda iti adayo​—kadagiti ili, purok, ken away​—tapno itukonda dagitoy a libro a naawagan kas “Helping Hands for Bible Student” kadagidiay maragsakan nga agbasa.

Idi 1908, ipapaima da Kabsat White ken ti dadduma pay a naregta nga agibumbunannag ti innem a tomo a libro a clothbound iti gatad a $1.65 (U.S.). Imbes nga ipaimada a dagus ti Dawn, alaenda nga umuna dagiti order sadanto agsubli​—kadawyanna iti aldaw ti sueldo​—tapno itulodda sada alaen ti bassit a gatad kas sukat ti pannakayimprentana. Uray la nagreklamo ti maysa a bumusbusor gapu iti kinabassit ti kontribusion para kadagiti libro!

Malagip ni Malinda Keefer a makapaorder idi iti 200 agingga iti 300 a libro iti kada lawas. Ngem adda parikut gapu iti adu nga order a libro a Dawn. Agasem, ti laeng maikanem a tomo ket addaanen iti 740 a panid! Bigbigen ti The Watch Tower a nakarigrigat ti agideliver nangruna kadagiti kakabsat a babbai ta “agdagsen iti 40 a pound (18 kg) ti 50 a libro.”

Tapno masolusionan dayta, nangimbento ni Kabsat James Cole iti makulpi a kaha a dua ti pilidna a pakaitornilioan ti maleta. Gapu ta saandan a masapul a bagkaten dagiti nadagsen a karton a napno kadagiti libro, kuna ti nangimbento: “Saanakon nga agpakarigat nga agbagkat.” Impakitana ti imbensionna kadagiti maragragsakan nga immatender iti 1908 a kombension dagiti Estudiante ti Biblia idiay Cincinnati, Ohio. Adda nayukit a nagan a Dawn-Mobile iti pagiggamanna gapu ta ti kangrunaan a kargana ket dagiti tomo ti Millenial Dawn. Nalaka laeng a masursuro nga ibiahe ti maleta a napno kadagiti libro uray maysa la nga ima ti mangiggem iti dayta. Mabalin a baliwan ti katayagna, ken agtaray latta dagiti pilidna uray no saan a sementado ti kalsada. Kalpasan ti agmalmalem a panangasaba, mabalin a kulpien nga ipangato dagiti de goma a pilidna tapno nalaklaka a bagkaten bayat a magmagna wenno nakalugan nga agawid.

Libre ti Dawn-Mobile kadagiti kakabsat a babbai nga adda iti amin-tiempo a serbisio. Ngem iti dadduma, aggatad dayta iti $2.50 (U.S.). Kabesadon ni Kabsat Keefer (adda iti ladawan) nga usaren ti Dawn-Mobile ta kabaelanna a guyoden babaen ti maysa laeng nga imana ken adda pay iggem ti sabali nga imana a bag a napno iti libro. Gapu ta adu ti interesado a nasarakanna iti maysa nga ili a pagminasan idiay Pennsylvania, U.S.A., masansan a mamitlo wenno mamimpat a bumallasiw iti rangtay no aldaw ti panagideliverna.

Idi maudi a paset ti dekada ’80, adda piloto ti eroplano a nakaimbento iti de pilid a maleta a gagangay a makitkita ita kadagiti airport ken natao a kalsada iti siudad. Ngem agarup 100 a tawenen ti napalabas, us-usarenen dayta dagiti naregta nga Estudiante ti Biblia ket uray la mapataliaw dagiti masmasdaaw a tattao bayat a guyguyodenda dagiti Dawn-Mobile iti panangiranudda kadagiti nagpateg a bin-i ti kinapudno iti Biblia.

[Blurb iti panid 32]

Masansan a mamitlo wenno mamimpat a bumallasiw ni Kabsat Keefer iti rangtay no aldaw ti panagideliverna

[Blurb iti panid 32]

Nasolusionan ti narigat a panagideliver iti Dawn