Panagdaliasat a Kadua Dagiti Pilgrim

“DIAK la ketdi makapagbalaybalay!” No manon a kabbaro a mayad-adalan iti Biblia ti nakarikna iti kasta maipapan iti panangasaba! Ngem daytoy a panagkedked ket imbaga ti maysa nga eksperiensiado a pumapalawag ken mannursuro iti Biblia a naawagan iti pilgrim.

Adu a managbasa iti Zion’s Watch Tower a nangpanaw iti simbaanda ti agtarigagay a makitimpuyog kadagidiay makapennek iti panagbisinda iti kinapudno ti Biblia. Imparegta ti magasin a sapulenda dagiti padada a mangipatpateg iti kinapudno ket regular nga agtataripnongda tapno agadalda iti Biblia. Idi agarup 1894, nangibaon ti Watch Tower Society kadagiti agdaldaliasat a pannakabagi a sumarungkar kadagiti grupo nga agkidkiddaw a mabisita. Idi agangay, naawagan dagitoy a pannakabagi kas pilgrim. Eksperiensiado ken nagaget dagitoy a lallaki, a napili gapu ta naemmada, nalaingda iti Biblia, ken batidoda nga agpalawag ken mangisuro, ken gapu ta ipatpategda ti subbot. Maysa wenno dua nga aldaw ti gagangay nga ibibisitada. Adu nga Estudiante ti Biblia ti damo a nakipaset iti ministerio babaen ti panagibunongda iti imbitasion para iti palawag publiko ti pilgrim. Kalpasan ti palawagna iti maysa nga eskuelaan iti maysa a rabii, ni Hugo Riemer, a nagbalin idi agangay kas miembro ti Bagi a Manarawidwid, sinungbatanna dagiti naibatay-Biblia a saludsod agingga iti parbangon. Maragsakan nupay nabannog, ket kinunana a “nagsayaat” dayta a gimong.

Kuna ti The Watch Tower a ti “kangrunaan a pagimbagan” ti ibibisita dagiti pilgrim ket ti pannakapabileg ti “sangakabbalayan ti pammati” babaen iti babassit a gimong iti pagtaengan dagiti manamati. Immay dagiti Estudiante ti Biblia manipud iti kabangibang a luglugar tapno dumngeg kadagiti palawag ken makiraman iti saludsod ken sungbat a diskusion. Managpadagus dagiti kakabsat. Balasitang pay ni Maude Abbott idi dimngeg iti maysa a palawag iti agsapa, a kalpasan dayta simmangoda amin iti atiddog a lamisaan. “Naruay ti agkakaimas a taraon​—hamon, fried chicken, nadumaduma a tinapay, pie, ken keyk! Nagpempennekkami a nangan, ket agarup 2:00 iti malem idi nagsublikami nga agdengngeg iti sabali pay a palawag. Ngem agdudungsakamin amin.” Kinuna ti nabayag a nagserserbi a pilgrim a ni Benjamin Barton, ‘No kinnanko amin nga agkakataba a naidasar, nabayag koman nga awanak kas maysa a pilgrim.’ Idi agangay, imbalakad ti surat manipud iti hedkuarter idiay Brooklyn a maipaayan ti pilgrim iti “simple laeng a taraon” ken umdas nga inana iti rabii.

Naballigi ti panangisuro dagiti pilgrim. Nagusarda kadagiti tsart, modelo, wenno aniaman nga adda kadakuada tapno agbalin a nabiag ti panangisuroda. Dagiti palawag ni R. H. Barber ket “kanayon a makapagagar.” “Kasla maysa a patriarka idi ugma” ti panagsasao ti nadungngo a ni W. J. Thorn. Iti maysa nga aldaw a nagbiahe ni Shield Toutjian iti Model A Ford, pagammuan ta impukkawna, “Aguray!” Timpuak sa napan nangkettel iti sumagmamano nga atap a sabong, ket inlawlawagna kadagiti kakaduana ti maysa a maadal kadagiti parsua ni Jehova.

Narigat ti trabaho dagiti pilgrim, ket nangruna a marigatanda no tumaengandan. Ngem para iti dadduma, ti kadakkelan a pannubok isu ti panagbaliw ti nakaipamaysaan ti trabahoda. Isudan ti mainanama a mangidaulo iti panangasaba iti binalaybalay. Kuna ti Marso 15, 1924 a Watch Tower a “ti maysa a kangrunaan nga annongen” dagiti pudno a Kristiano ket “panangikasaba iti pagarian. Daytoy ti nakaibaonan dagiti pilgrim.”

Saan a nagustuan ti sumagmamano a pilgrim dayta a panagbalbaliw ta pinanawanda ti panagdaliasat a trabaho, ket adda pay ketdi dagiti nangbukel iti bukodda a grupo. Malagip ni Robie D. Adkins ti maysa a pilgrim a nalaing a pumapalawag a nangisennaay: “Awanen ti sabali nga ammok no di ti mangasaba iti entablado. Diak la ketdi makapagbalaybalay!” Malagip ni Kabsat Adkins: “Simmaruno a nakitak isuna iti kombension idiay Columbus, Ohio idi 1924. Nakapimpiman unay ta agmaymaysa a nakatakder iti sirok ti bassit a kayo ken naliday no idilig iti rinibu a nararagsak a kakabsat. Daydin ti naudi a pannakakitak kenkuana. Di nagbayag, pinanawannan ti organisasion.” Iti sabali a bangir, “adu a nararagsak a kakabsat ti napan kadagiti luganda nga awitda ti adu a libro,” a madlaw a magagaranda a mangasaba iti binalaybalay.​—Ara. 20:20, 21.

Adu a pilgrim ti sireregta a nangasaba, nupay nalabit agnernerbiosda a kas kadagiti indibidual a sanayenda. Maipapan iti panangasaba iti binalaybalay, insurat ni Maxwell G. Friend (Freschel) a maysa a pilgrim a German ti pagsasaona, “Daytoy a trabaho ti pilgrim ti mangnayon iti rag-o ti panagdaliasat.” Inreport ti pilgrim a ni John A. Bohnet a kaaduan a kakabsat ti naimpusuan nga immanamong a kasapulan ti pannakaikasaba ti Pagarian. Sigun kenkuana, kayat ti kaaduan a kakabsat ti “mapan iti sanguanan ti dangadang gapu iti sumsumged a regtada.”

Iti panaglabas ti tawtawen, nagsayaat ti impluensia dagitoy a matalek nga agdaldaliasat. “Pudno a nakapatpateg ken makagunggona ti trabaho dagiti pilgrim, uray pay iti imatang iti ubing idi a kas kaniak,” kinuna ti nabayagen a Saksi a ni Norman Larson. “Dakkel ti naitulongda iti pannakaiturongko iti umiso a dana.” Agingga ita, dagiti kasta a managsakripisio ken nasungdo nga agdaldaliasat a manangaywan tultulonganda dagiti kapammatianda a mangikuna, “Kabaelantay ti agbalaybalay!”

[Blurb iti panid 32]

Nakaragragsak ti kaadda dagiti pilgrim!

[Ladawan iti panid 31]

Agarup 170 a grupo ti binisita ni Benjamin Barton idi 1905

[Ladawan iti panid 32]

Walter J. Thorn, pilgrim a pagaammo kas Pappy gapu iti nadungngo ken kas ken Kristo a kababalinna

[Ladawan iti panid 32]

J. A. Browne, pilgrim a naibaon a mangpabileg ken mangparegta iti 14 a babassit a grupo idiay Jamaica idi agarup 1902

[Ladawan iti panid 32]

Ti trabaho dagiti pilgrim ti nangpabileg iti pammati, nangpatibker ti Nakristianuan a panagkaykaysa, ken nangyadani kadagiti kakabsat iti organisasion