SALSALUDSOD DAGITI AGBASBASA

Napapatay kadi dagiti kriminal iti nagkauna nga Israel babaen ti pannakaibitay iti poste?

Adu a nagkauna a nasion pinapatayda ti sumagmamano a kriminal babaen ti panangilansada kadagita iti kayo wenno poste. Dagiti Romano inggalut wenno inlansada ti kasta a kriminal iti maysa a poste, a mabalin a mabaybay-an a sibibiag iti sumagmamano nga aldaw agingga a matay gapu iti ut-ot, waw, bisin, pudot, lamiis, ken dadduma pay. Imbilang dagiti Romano ti pannakailansa iti kayo kas nakababain a pannusa a para laeng kadagiti kadaksan a kriminal.

Kasano met a napapatay dagiti kasta a kriminal iti nagkauna nga Israel? Napapatayda kadi babaen ti pannakaibitay iti poste? Imbilin ti Mosaiko a Linteg: “No kas pagarigan ti maysa a lalaki maaddaan iti basol a maikari iti sentensia nga ipapatay, ket napapatayen, ket imbitinmo iti kayo, ti natay a bagina rebbeng a saan nga agtalinaed iti kayo iti intero a rabii; no di ket di bumurong nga itabonmo iti dayta nga aldaw.” (Deut. 21:22, 23) Nabatad ngarud nga idi tiempo ti Hebreo a Kasuratan, ti tao a maikari a matay ket mapapatay nga umuna sa maibitin iti poste wenno kayo.

Mainaig iti dayta, kunaen ti Levitico 20:2: “Asinoman a tao iti annak ti Israel, ken asinoman a ganggannaet nga agnanaed nga agtaeng kas ganggannaet iti Israel, a mangited ken Molec iti asinoman kadagiti putotna, rebbeng a mapapatay a di bumurong. Dagiti umili iti daga rebbeng nga isu uborenda iti batbato agingga a matay.” Mapapatay met dagidiay “addaan espiritu ti pannakiuman wenno espiritu ti panagipadles.” Kasano? Babaen ti ‘pannakauborda iti batbato.’​—Lev. 20:27.

Mabasatayo iti Deuteronomio 22:23, 24: “No kas pagarigan adda birhen a babai a naitulag iti maysa a lalaki, ket pudno a masarakan ti maysa a lalaki iti siudad ket makikaidda kenkuana, masapul met nga iruaryo ida a dua iti ruangan dayta a siudad ket uborenyo ida iti batbato, ket masapul a matayda, ti babai iti rason a saan a nagriaw iti siudad, ken ti lalaki iti rason a minulitanna ti asawa ti padana a tao. Gapuna masapul nga ikkatem ti dakes iti tengngam.” Para ngarud kadagiti nagkauna nga Israelita, pannakaubor ti kangrunaan a pamay-an a pannakapapatay dagiti nakaaramid iti nakadakdakes a krimen.a

Kuna ti Deuteronomio 21:23 a “daydiay naibitin ket inlunod ti Dios.” Sigurado a napabutngan dagiti Israelita iti pannakaipabuya iti publiko ti bangkay ti maysa a kriminal nga “inlunod ti Dios.” Nagserbi ngarud kas pakdaar ti pannakaibitin ti bangkay ti kasta a tao iti maysa a poste wenno kayo.