Panagserbi iti Dios ti Agasna!
Dua a payunir idiay Kenya ti naawis a sumrek iti maysa a balay. Nasdaawda idi nakitada ti bassit a lalaki a nakaidda iti katre nga ababa ti bagi ken im-imana. Napalalo ti isemna bayat nga iranranudda kenkuana ti kari ti Dios a “kumalay-atto daydiay pilay a kas iti panagkalay-at ti kalakian nga ugsa.”—Isa. 35:6.
Naammuan dagiti payunir a ni Onesmus ket nayanak nga addaan iti osteogenesis imperfecta, wenno brittle bone disease. Nakarasrasi dagiti tulangna ket nalaka a matukkol. Gapu ta di maagasan daytoy a sakit, mainanama a nakadalit lattan ni Onesmus iti wheelchair-na nga agpapaut-ot iti intero a panagbiagna.
Immanamong ni Onesmus a makipagadal iti Biblia. Ngem saan a palubosan ni nanangna a tumabuno kadagiti gimong ta amangan no madangran ken kumaro laeng ti ut-ot a sagsagabaenna. Isu nga irekrekord dagiti kakabsat dagiti gimong ti kongregasion tapno mangngeg dagita ni Onesmus. Kalpasan ti lima a bulan a pannakipagadalna, inkeddengna ti makigimong uray no delikado ti kasasaadna.
Kimmaro kadi ti ut-ot a marikrikna ni Onesmus idi tumabtabunon kadagiti gimong? Saan. “Kasla maksayan ti ut-ot a marikriknak no addaak iti gimong,” kunana. Mariknana a simmayaat ti kasasaadna gapu iti naammuanna a namnama. Napaliiw ni nanangna a simmayaat ti rikna ti anakna ket napalalo ti ragsakna isu a nagpayadal met iti Biblia. “Panagserbi iti Dios ti agas ti anakko,” masansan a kunaenna.
Di nagbayag, nagbalin ni Onesmus a di bautisado nga agibumbunannag. Idi agangay, nabautisaran ket agserserbi itan kas ministerial nga adipen. Nupay saanna a mausar dagiti sakana ken ti maysa nga imana, kayatna nga aramiden ti amin a kabaelanna nga agserbi ken Jehova. Kayatna ti ag-auxiliary pioneer ngem bumdeng nga agaplikar. Apay? Gapu ta ammona a kanayon a masapul nga adda mangiduron iti wheelchair-na. Idi inyebkasna dayta kadagiti kakabsat, inkarida a suportaranda. Kasta ti inaramidda, ket natulonganda ni Onesmus nga ag-auxiliary pioneer.
Kasta met laeng ti pakaseknan ni Onesmus idi kayatna ti ag-regular pioneer. Ngem iti naminsan a panangusigna iti inaldaw a teksto, naparegta iti kunaen ti Salmo 34:8: “Nanamenyo ken kitaenyo a ni Jehova naimbag.” Kalpasan nga inut-utobna dayta a kasuratan, inkeddengna ti ag-regular pioneer. Mangaskasaba itan iti uppat nga aldaw iti kada lawas ken addaan kadagiti narang-ay a yad-adalan iti Biblia. Nageskuela ni Onesmus iti Pioneer Service School idi 2010. Anian a ragsakna ta ti instruktorna ket maysa kadagiti dua a kakabsat nga immuna a nakisarita kenkuana!
Dandani 40 itan ti tawen ni Onesmus. Natayen dagiti nagannakna, ngem dagiti kakabsat iti kongregasion ti mangipapaay iti inaldaw a kasapulanna. Agyamyaman iti amin a bendision a maaw-awatna, ket segseggaanna ti aldaw nga “awanto[n] ti agtataeng nga agkuna: ‘Masakitak.’”—Isa. 33:24.