Itan Ti Tiempo

¹ Idi insurat ni apostol Pablo ti maikadua a suratna kadagiti taga-Corinto, impalagipna kadakuada ti panangikeddengda a bumadang iti pagimbagan dagiti kapammatianda idiay Jerusalem. Nupay kasta, napalabasen ti makatawen, ket dida pay nalpas ti trabaho nga inrugida. Isu nga indagadagna kadakuada: “Inkayo ket ileppasyo dayta; nagagarkay koma a mangileppas iti gakat a kas no tagikuaenyo koma dayta.”​—2 Cor. 8:11, The New English Bible.

² Iti naminsan wenno iti sabali a panawen, nangisaadtay amin kadagiti kalattayo. Mabalin nga inkeddengtayo a pawadwaden ti pannakiraman iti tay-ak ti ministerio, tapno nasaysayaat ti pannakaam-ammotayo kadagiti kakabsattayo, makualipikar iti maysa a pribilehio, wenno maparmek ti sumagmamano a pagkapuyan. Nupay naimbag ti panggeptayo a nangirugi, nalabit ditay intuloy nga inannurot tapno magun-odan ti kalattayo. Sakbay a nadlawtayo, naglabas gayamen dagiti lawas, bulan, wenno tawen pay ketdin nga awan rimmang-ayantayo. Saan ngata a masapul a yaplikartayo iti bagbagitayo ti balakad nga “intayo ket ileppas” ti rinugiantayo?

³ Pananggun-od iti Kalattayo: Nalaka ti mangaramid iti personal a pangngeddeng ngem narigrigat nga itungpal ti kalattayo. Mabalin a lapdan ti panangitungtungkua ti aniaman nga irarang-ay. Masapul a determinadotayo a mangidur-as a di agtaktak. Nasken iti panangilasin ti tiempo a kasapulan tapno maileppas ti trabaho. Nasayaat no adda naituding a pannakaleppasna ken siguraduen a matungpal dayta.

⁴ No marigatantay a mangtungpal iti kalattayo, nalaka laeng nga irason: ‘Aramidek no madamdama.’ Ngem ditay ammo no aniantot’ mapasamak iti masanguanan. Nangballaag ni adalan a Santiago: “Ta dikay ammo no anianto ti pagbalinan ti biagyo inton bigat. . . . No ti maysa ammona ti agaramid iti umiso ket kaskasdi dina aramiden dayta, basol dayta kenkuana.”​—Sant. 4:13-17.

⁵ Gapu iti nagadu a pakasingaan kasta met dagiti kiddaw ti sabsabali, nakalaklaka a mabaybay-an dagiti kalattayo. Kasapulan ti panangikagumaan tapno kanayon a malagiptayo. Makatulong ti kanayon a panangikararagtayo. Mabalin a sumayaat ti kasasaad no ipakaasi iti sabsabali a palagipan ken paregtaendatayo. No aginotartay iti kalendariotayo mapalagipantayto a mangamiris iti panagrang-aytayo. Masapul nga ikeddeng ti maysa a tao nga “aramidenna koma kas iti inkeddengna iti pusona.”​—2 Cor. 9:7.

⁶ Ipaay ti bulan ti Oktubre iti nasayaat a gundaway tapno maipamaysa dagiti kalattayo. Itukontayto ti suskripsion Ti Pagwanawanan ken Agriingkayo! Mabalin kadi a mangikeddengtay iti nainkalintegan a kalat a gun-oden? Ania ngata no padasentay a pawadwaden ti maipaimatay a magasin? Ti desision a mangpaadu iti panagsarungkar ken panangirugi iti panangyadal ti Biblia ket nainkalintegan a kalat para kadagiti adu.

⁷ Saan a nainsiriban ti panangitungtungkua iti napateg a banag, ta daytoy a “lubong aglabas.” (1 Juan 2:17) Magun-odantay itan dagiti naisangsangayan a pribilehio ti panagserbi. Adda kadatayo a manggundaway kadakuada.