Baro a Programa iti Asamblea Sirkito
1 Mangrugi inton Pebrero, 1996, ti tema dagiti asamblea sirkito ket “Dumngeg ken Agsursuro a Mangitungpal iti Sao ti Dios.” Daytoy a tema, a naibasar iti Deuteronomio 31:12, 13, mangted iti maitutop a basaran a maipaay iti intero a programa a mangitampok kadagiti leksion a masapul a sursuruen ken iyaplikartayo.
2 Nupay dumngeg ti kaaduan a tattao ita kadagiti makaallilaw a naipaltiing a sasao, adda nasken a panagkasapulan a dumngegtayo iti Sao ti Dios ken sursuruen nga itungpal dayta. (Luc. 11:28; 1 Tim. 4:1) Gapu ta sipapanunot iti daytoy, nadisenio ti programa ti asamblea sirkito a mangipaay iti pammaregta ken tumulong kadagiti agibumbunannag, pamilia, panglakayen, ken payunir. Iti Sabado, addanto nagkapat a paset a simposiom iti tema a “Panangsaranget Kadagiti Problematayo—Babaen ti Panagimdeng iti Sao ti Dios.” Ket iti agsapa ti Domingo, addanto simposiom a napauluan iti “Kasano a Dagiti Kasuratan Mangdisiplina iti Kinalinteg.” Ti intero a programa mangidatagto iti naespirituan a pammaregta isu a dakayo ken ti pamiliayo saan koma a maikapis.
3 Agpada iti Sabado ken Domingo, maitukon ken maidemostranto dagiti praktikal a singasing a maipaay iti tay-ak ti ministerio. Maidatagto met dagiti makapabileg ken makaisuro a kapadasan ken pannakiuman. Iti kasta, ti kaadda ken iyiimdeng a ti panggep ket iyaplikar dagiti masursuro, nasaysayaatto ti naan-anay a panangitungpalyo iti bilbilin ti Sao ti Dios.
4 Maysa kadagiti tampok ti asamblea sirkito isunto ti bautismo dagiti kabbaro a dedikado a kakabsat a lallaki ken babbai. Sakbay pay daytoy publiko a deklarasion ti dedikasionda, ibaga koma dagiti kandidato ti tarigagayda nga agpabautisar iti mangidaulo a manangaywan tapno mayurnosna dagiti panglakayen a makisarita kadakuada.
5 Ti palawag publiko iti daytoy a serye ti asamblea sirkito ket napauluan ti “Apay a Paidalankayo iti Biblia?” Sakbay ti asamblea, rugianyon ti agawis iti interesado a tattao a tumabuno. Kas panangsegsegga iti kasapulan unay a pammaregta ken badang a maawatyo ken ti pamiliayo, mangaramidkayon iti masinunuo a plano tapno presentekayto iti intero a programa.