Pagtalinaeden a Naipamaysa ti Panunotyo Kadagiti Bambanag Sadi Ngato
1 Iti panangkomentona iti daytoy agdama a kaputotan ken ti panangmatmatna iti masanguanan, kinuna ti artikulo ti The New York Times a Disiembre 31, 1994: “Kaamak dagiti tattao ti masanguanan. Kabutengda dayta no maipapan iti panggedan, maipapan ti sakit, maipapan iti ekonomia, maipapan iti kasasaad ti lubong.” Sadinoman a taliawentayo, adda rikna iti panagduadua maipapan ti biag. Idinto ta datayo kas Saksi ni Jehova ket maipasango kadagiti isu met Iaeng a problema a kas kadakuada, ti pammati ken talektayo iti sigurado a karkari ti Sao ti Dios tumulong kadatayo a maaddaan iti naiduma a panangmatmat iti biag ken iti masanguanan.—Isa. 65:13, 14, 17.
2 Ti kinapositibo ken kaadda ti sigurado a namnamatayo ti makagapu a dumngeg dagiti nasingpet panagpuspusona a tattao iti mensahe nga idanontay kadakuada. Adu a malmaldaang ken mairurrurumen a tattao ti makapaneknek a makaliwliwa ti pannakisaoda kadatayo. Agsipud ta magustuanda ti mangngegda, dadduma ti mayat a makiadal iti Biblia kadatayo. Nupay kasta, no dadduma, mabalin a kayat dagiti tao a pagsaritaan nga umuna dagiti bukodda a problema. Nupay adda tiempo a mabalintay ti dumngeg kadagiti personal a pagdandanagan iti maysa, ditay koma maisiasi iti rantatayo, nga isu ti panangisuro kadakuada kadagiti positibo a kinapudno ti Sao ti Dios.
3 Pudno a kayattay ti makipagrikna kadagidiay madagdagsenan. Intuyang ni Jesus ti ehemplo idi kinunana ti nailanad iti Mateo 11:28: “Umaykayo kaniak, dakayo amin a mabambannogan ken nadagsenan.” Kayattayo a paregtaen dagiti tattao iti isu met laeng a pamay-an. Ngem siputanyo, ti adda iti ngudo ti bersikulo 28, a kinuna ni Jesus: “Pagin-awaenkayto.” Dayta koma ti panggeptayo. Maaramidtayo dayta babaen ti panangiranud iti makarepresko a karkari manipud Sao ti Dios. Idemostra ti kinalaingtay a managdengngeg ti personal nga interestayo ket nasken daytoy iti panangitungpal iti komisiontayo a mangasaba, a tulongan ti sabsabali a mangbigbig a ti Pagarian isut’ kakaisuna a sigurado a remedio dagiti amin a problema ti sangatauan.—Mat. 24:14.
4 Ti trabahotayo ket saan a kas iti propesional nga eksperto a mangngagas. No di ket, kas inlawlawag ni Pablo iti 1 Timoteo 4:6, ti trabahotayo isut’ ministerio ti “nasayaat a sursuro,” ti sursuro a masarakan iti Sao ti Dios. Dagidiay addaan iti personal wenno emosional a problema ket masapul a paregtaen nga agtaklinda ken Jehova. Isuro ida a mangtaginayon ti ‘pampanunotda a naipamaysa kadagiti bambanag sadi ngato’—bambanag a naisinggalut iti namnama ti Pagarian. (Col. 3:2) No kanayon nga ipamaysa dagiti tattao ti atensionda iti Sao ti Dios, mapatibkerda kas resulta ti nabileg nga impluensia a sumamay iti bibiagda.—Heb.4:12.
5 Gapuna ti kalattayo isut’ tumulong iti tattao a mangipamaysa iti pampanunotda kadagiti bambanag a ‘nalinteg, nadalus, maay-ayat, ken naimbag ti pakasarsaritaanda.’ (Fil. 4:8) No ipamaysada ti atensionda iti namnama ti Pagarian, masagrapdanto met ti rag-o nga aggubuay iti pannakaammo a solbaren ni Jehova inton agangay ti amin a problemada babaen iti Pagarianna.—Sal. 145:16.