Agbalinkayo a “Naregta iti Nasayaat nga Ar-aramid” Bayat ti Abril!
1 Iti Abril, kalattayo a makiraman iti ministerio ti amin nga agibumbunannag. Pudno a makaparegta no tunggal agibumbunannag iti daytoy a pagilian makiramanda iti trabaho a panangasaba sakbay nga agngudo ti Abril. Bayat a presko pay laeng iti panunottayo ti Panglaglagip iti Ipapatay ni Kristo, sigurado a kayattayo nga ipakita ti apresasiontayo iti kinaimbag ti Dios babaen ti panangitukon iti direkta a “sakripisio ti panagdaydayaw” iti ministerio iti tay-ak.—Heb. 13:15.
2 Bayat ti nabatbati a paset ti Abril, nasken ti napinget a panangikagumaan tapno maammuan dagiti kasapulan ti tunggal kameng ti kongregasion tapno sigaganetget a makiramanda amin iti ministerio sakbay nga agngudo ti bulan. (Roma 15:1) Ammo koma dagiti manangaywan iti panagadal iti libro ti kasasaad dagidiay adda iti grupoda ken mangipaayda iti praktikal a tulong no kasapulan. Adda kadi agkasapulan iti pagluganan? Siasino ti makaipaay iti dayta? Adda kadi dagidiay managbabain? Adda kadi aduan kapadasan nga agibumbunannag a mangkadua kadakuada? Dagiti ngay masakit wenno baldado? Mabalin kadi a makiramanda iti panangasaba babaen ti telepono, iti surat, wenno iti dadduma pay a nabunga nga aktibidad?
3 Mabalin a maparegta ti dadduma a nagbalin a di aktibo babaen ti panagdengngegda iti palawag ti Memorial inton Abril 12. Gapuna nasayaat ti mangaramid iti naisangsangayan a panagregget a mangsarungkar iti siasinoman a di aktibo a tumabuno iti Memorial ken iyadalanyo ida iti Biblia. Kalpasan ti Memorial, nalabit matignaydanto nga agbalin nga aktibo ken makiraman manen iti ministerio.
4 Sanayenyo Dagiti Agtutubo a Makipaset: Adu nga annak dagiti Saksi ni Jehova ti kumuykuyog kadagiti dadakkelda iti trabaho a panagbalaybalay iti adun a tawen, nupay saanda pay laeng nga agserserbi kas di bautisado nga agibumbunannag. Daytoy kadi ti tiempo tapno mangrugida kas di bautisado nga agibumbunannag? Naimpusuan kadi ti pannakatignayda ken sisasaganadan a makiraman a naan-anay iti trabaho a panagbalaybalay? Natakuatan dagiti ulo ti pamilia a makatulong no repasuenda ti parapo 1 ken 2 iti panid 82 ti libro nga Organisado iti panangikeddengda no kualipikadon dagiti annakda nga agbalin nga agibumbunannag sa surotenda dagiti addang a naibalabala sadiay.
5 Dagiti Kualipikado nga Estudiante iti Biblia Tuladenda ti Trabaho nga Inaramid ni Jesus: Saan laeng a dagiti instruksion mainaig kadagiti doktrina ti insuro ni Jesus. Kinuyogna dagiti estudiantena iti ministerio ken insurona ida a mangasaba. (Luc. 8:1; 10:1-11) Ania ti kasasaad ita? Nasurok a sangagasut a ribu ti mayad-adalan ditoy Pilipinas. Awan duadua, no maitutop ti pannakaparegtada, adu kadagitoy nga estudiante ti rumang-ay iti pannakasanayda ken makakualipikarda nga agserbi kas di bautisado nga agibumbunannag iti Abril.
6 No mangyad-adalkayo iti Biblia, usigenyo dagitoy a saludsod: Rumangrang-ay kadi ti estudiante, sigun iti edad ken abilidadna? Iranranudna kadin ti patpatienna kadagiti sabsabali iti di pormal a pamay-an? Ikawkawesna kadin ti “baro a personalidad”? (Col. 3:10) Maragpatna kadin dagiti kualipikasion para kadagiti di bautisado nga agibumbunannag a naibalabala iti panid 79-81 iti libro nga Organisado? No kombinsidokayo a kualipikadon, apay a diyo pagsaritaan daytoy a banag? Adda dagiti estudiante a saan laeng a direkta a panangawis ti kasapulan tapno makiramanda iti trabaho. Siempre, no sidadaan ti estudiante, umuna pay nga iyurnos ti mamangulo a manangaywan nga adda dua a panglakayen a makisarita kadakayo ken ti iyad-adalanyo. Iti sabali a bangir mabalin nga adda makalapped iti estudiante. Nalabit maysa a panglakayen ti mangkadua kadakayo iti panagadalyo iti Biblia tapno maammuanna ti rikrikna ti estudiante maipapan iti kinapudno. Kalpasan a mangngegna ti opinion ti estudiante, mabalin a mangipaay ti panglakayen kadagiti praktikal a singasing agraman ti Nainkasuratan a tulong.
7 ‘Gatangenyo ti Tiempo’ nga Ag-auxiliary Pioneer: Bayat ti panawen ti Memorial iti kada tawen, rinibu ti matignay a ‘manggatang’ iti tiempo nga ag-auxiliary pioneer gapu iti panangapresiarda iti subbot. (Efe. 5:15-17) Nupay kasapulan ti panagsakripisio, adu met ti bendision. Ginundawayan ti adu nga agtutubo ti ag-auxiliary pioneer bayat ti bakasionda iti eskuelaan. Dagiti adulto nga adda iti amin-tiempo a sekular a trabaho ginundawayanda dagiti sardam ken ngudo ti lawas iti daytoy met laeng nga aktibidad. Yantangay lima ti ngudo ti lawas ti Abril, awan duadua nga adu ti makaaramid iti kastoy. No saankayo a makapagpasalista iti Abril, apay a diyo ikabilangan ti ag-auxiliary pioneer iti Mayo tapno masarungkaranyo dagiti interesado a nabirokanyo iti Abril?
8 Makapag-auxiliary pioneer-kayo man wenno saan, mangbirokkayo iti pamay-an a mangpaadu iti panawen a pannakiramanyo iti tay-ak ti serbisio iti Abril. Mangaramidkayo iti kalat, daydiay kabaelanyo a ragpaten. Magunggonaan ti tarigagayyo a “mangbusbos ken naan-anay a mabusbos” iti panagserbi ken ni Jehova.—2 Cor. 12:15.
9 Dagiti Taripnong Sakbay ti Panangasaba: No mabalbalin, inaldaw koma a mayurnos dagiti taripnong sakbay ti panangasaba bayat ti Abril. Maaramid met dagiti kasta nga urnos para iti panangasaba iti sardam. Adu nga agibumbunannag ti makiraman iti serbisio ti tay-ak kadagiti ngudo ti lawas, isu a dagiti kongregasion masapul a mangyurnosda kadagiti taripnong sakbay ti panangasaba kadagiti agsapa ken malem ti Sabado.
10 Kadagiti Panglakayen—Kasapulan ti Naannad a Panagplano: Nasaysayaat no mawanas ti amin a teritoria ti kongregasion bayat ti bulan ti Abril ken Mayo. Maikkan iti naisangsangayan nga atension ti aniaman a lugar ti negosio a naituding iti kongregasion. Masapul a nakasagana ken nanakman ti kawes dagidiay mangasaba kadagitoy a lugar. Saan a kasapulan ti napaut a pannakisarita. No makisaritakayo iti maysa a negosiante, mabalinyo nga ibaga a masansan nga awan ti madandanonyo a negosiante kadagiti pagtaenganda, isu a sarsarungkaranyo ida iti lugar ti negosioda tapno idatagyo ti maysa nga artikulo a sigurado a paginteresanda. Kalpasanna, mabalinyo ti mangiranud iti apagbiit iti espesipiko a punto iti magasin. Nasken a nasayaat met ti pannakaorganisar ti panangasaba iti lansangan tapno mangipaima kadagiti magasin iti teritoria a sakup ti kongregasion. Nalabit adda sabali pay a lugar iti teritoriayo a mabalinyo a wanasen bayat ti Abril, kas iti eropuerto, ospital, paradaan, parke, ken dagiti balay a pagbakasionan. Masapul nga ikeddeng ti bagi dagiti panglakayen no ania dagiti maitutop nga urnos iti panangasaba kadagitoy a lugar iti teritoria ti kongregasionyo.
11 Saan a mabambannog ni Jehova nga agtrabaho. (Juan 5:17) Pinarsuana ti langit ken daga agraman dagiti mula ken animal; ngem intultuloyna ti nagtrabaho agingga a naaramidna ti kapatgan a parsuana ditoy daga—ti tao. Ti biagtayo ket resulta ti kinamasindadaan ti Dios nga agtrabaho. Kas “tumutulad iti Dios,” masapul a ti ayat ti mangtignay kadatayo nga agbalin a “naregta iti nasayaat nga ar-aramid.” (Efe. 5:1; Tito 2:14) Yantangay maikari ni Jehova nga umawat iti kasayaatan a maipaaytayo ken gagangay laeng a tarigagayan daydiay naregta a nasayaat ti resulta ti ministeriona, masapul ngarud nga interesadotayo a mangpasayaat iti kualidad ti ministeriotayo. Siempre, apresiaren ni Jehova ti aniaman a sakripisio nga ar-aramidentayo maipaay kenkuana ken pulos a saan nga ubbaw ti trabahotayo. (1 Cor. 15:58) Gapuna, buyogen ti managyaman a puso, reggetantayo ti aktibidadtayo bayat ti Abril, nga agtalektayo nga anamongan ken bendisionannatayo ni Jehova ken agballigitayo!