Dagiti Naingayyeman a Panagpapatang Madanonda ti Puso
1 Ti panagpapatang ket “panagsisinnukát iti ideya babaen ti panagsao.” Ti panangirugi iti nainggayyeman a panagpapatang iti topiko a pakaseknan dagiti sabsabali ti mabalin a mangkayaw iti interesda ken tumulong kadatayo a mangdanon iti pusoda. Ad-adda nga epektibo ti makisao kadagiti tattao iti nainggayyeman ken natanang a wagas imbes a sermonan ida.
2 No Kasano a Rugian ti Nainggayyeman a Panagpapatang: Ti pannakisao iti sabsabali saanna a kayat a sawen a kasapulantayo ti mangidatag iti adu a makapasiddaaw a punto ken kasuratan. Kaipapananna laeng ti panangallukoy iti maysa a tao a makisao kadatayo. Kas pagarigan, no makisaotayo iti kaarruba, nainggayyeman ken saantay nga agnerbios. Saantay nga agsapsapul iti isaotayo no di ket natural ti panagsungbattay iti ibagana. Ti panangipakita ti napudno nga interes iti aniaman a sawenna ti mamagtultuloy kenkuana a makisao kadatayo. Pudno met dayta no mangasabatayo iti sabsabali.
3 Dagiti topiko a kas ti krimen, problema dagiti agtutubo, lokal nga isyu, kasasaad ti lubong, wenno uray ti panniempo ket mabalin nga usaren a pangirugi ti nainggayyeman a panagpapatang. Dagiti suheto a direkta a mangapektar iti biag dagiti tattao ket epektibo unay a pangriing ti interesda. Apaman a mairubbuat ti panagsasarita, mabalintay nga an-anaten nga iturong dayta iti mensahe ti Pagarian.
4 Ti pannakaadda iti natanang a saritaan dina kayat a sawen a saan a kasapulan ti panagsagana. Kasapulan. Nupay kasta, saan a kasapulan a mangputarka iti nainget a balabala wenno imemoria ti maysa a sermon, nga agbanag iti panagpapatang a saan a mayataday iti kasasaad nga agdama. (Idiligyo iti 1 Corinto 9:20-23.) Nasayaat ti mangisagana iti maysa wenno dua a tema ti Kasuratan, kalpasanna dagita ti pangibatayan ti pannakipatang. Ti panangrepaso kadagiti suheto a masarakan iti libro a Panakirinnason ket napaneknekan a makatulong iti daytoy.
5 Dagiti Nasken a Kalidad iti Nainggayyeman a Panagpapatang: No makisaotay iti sabsabali, masapul a nabara ken napudnotayo. Ti naisem ken naragsak a langa irimatna dagitoy a kalidad. Ik-ikutantay ti kasayaatan a mensahe ditoy lubong; makaguyugoy unay dayta kadagiti nasingpet ti panagpuspusoda. No mariknada a ti interestayo kadakuada ket maigapu iti napudno a tarigagay a mangiranud iti naimbag a damag kadakuada, mabalin a matignayda nga agimdeng.—2 Cor. 2:17.
6 Rebbengna a ti pannakisarsarita ket makaay-ayo a kapadasan. Ngarud, naanus ken nataktikatayo koma a mangidatag iti mensahe ti Pagarian. (Gal. 5:22; Col. 4:6) Ikagumaanyo ti mangibati iti nasayaat a kapaliiwan uray no ti tao ket saan a mangipangag.
7 Ti panangirugi ti nainggayyeman a panagpapatang ket saan a resulta ti panangkabesado iti sermon. Kaipapananna laeng iti panangawis iti interes iti tema a pakaseknan ti maysa a tao. Ikagumaantayo a danonen ti puspuso dagiti tattao babaen ti panangiranudtay kadakuada iti naimbag a damag ti Pagarian.—2 Ped. 3:13.