Tulonganyo Dagiti Sabsabali a Mangsarak iti Liwliwa
1 Adu dagiti tattao a nauman a makangkangngeg kadagiti didigra, gubat, krimen, ken panagsagaba. Ti liwliwa, nupay gagangay nga awan kadagiti damag itatta, isu ti pudno a kasapulan ti sangatauan. Ti panangliwliwa kayatna a sawen “panangipaay iti bileg ken namnama” ken “panangep-ep iti ladingit wenno pakaburiboran ti” sabali. Kas Saksi ni Jehova, nakabalantayo a tumulong kadagiti tattao iti kastoy a wagas. (2 Cor. 1:3, 4) Dagiti naibatay-Biblia a broshurtayo nga itukontayto iti Hulio ken Agosto naglaon iti makaliwliwa a mensahe ti kinapudno. (Roma 15:4) Adtoy ti sumagmamano a singasing iti panangisango kadagitoy iti sidong ti nagduduma a kasasaad:
2 Ti nakalkaldaang a damag mabalin a mangpataud iti gundaway tapno makasabaan ken maipaayan iti liwliwa dagiti sabsabali, nalabit babaen ti panangibagayo iti kastoy:
◼ “No mapasamak ti kakasta a banag, pampanunoten dagiti dadduma no pudno ngata nga adda Dios ken, no adda man, maseknan ngata kadatayo. Aniat’ makunayo? [Palubosanyo a sumungbat.] Ti maysa a wagas tapno maammuantayo no pudno nga adda Dios ket iyaplikartayo ti napasingkedanen a prinsipio.” Basaenyo ti Hebreo 3:4. Mangdakamatkayo iti dadduma pay a banag iti aglawlawtayo a nabatad nga adda nangaramid. Sa ituloyyo: “Adda awitko a broshur nga ammok a makitayonto a makaliwliwa. Napauluan iti Pudno Aya a Maseknan ti Dios Kadatayo? [Basaenyo dagiti saludsod iti akkub.] Naglaon kadagiti makapnek nga ebidensia saan laeng a ti kaadda ti Dios no di pay ket iti mabiiten pagpatinggaenna amin a di nasayaat a kasasaad a mapaspasarantay ita. Kayatyo kadi a basaen?” Iyurnos ti panagsubliyo.
3 Iti panagsarungkar, mabalinyo a kunaen:
◼ “Nagsaritaanta ti pammaneknek iti kaadda ti Dios idi imbatik ti broshur a Pudno Aya a Maseknan ti Dios Kadatayo? Nalabit nadlawyo daytoy a punto iti panid 7. [Ipakitayo ti ladawan ken gupgopenyo ti parapo 15.] Maysa laeng daytoy a pagarigan a mangipakpakita a talaga nga adda naayat a Dios. [Basaenyo ti parapo 27 iti panid 9.] Ti personal a panagadal iti Biblia tinulongannak a mangsaranget kadagiti inaldaw a parikut iti biag gapu ta ipakitana ti panangmatmat ti Dios kadagiti bambanag.” Kiddawenyo nga idemostrayo ti panagadal.
4 Mabalin ti mangasaba iti telepono nga usarenyo ti broshur nga “Ania ti Panggep ti Biag?—Kasanoyo a Masarakan Dayta?” Iyam-ammoyo ti bagiyo sa kunaenyo:
◼ “Immawagak ta adda napateg a mensahe nga ibagak kadakayo gapu ta diak makaumay kadakayo a personal.” Basaenyo iti natural ti umuna a parapo iti panid 4 ti broshur, a kasla kasarsaritayo iti sangon-sango. Pagsaludsodanyo no aniat’ makunana, sa palubosanyo a sumungbat. “Nakalukat ti Bibliak iti Isaias 45:18. Ipakita daytoy a bersikulo a naparsua ti daga a nairanta para kadatayo. Mabalin kadi nga ibasak kadakayo?” Kalpasanna, ilawlawagyo ti nakaisangratan ti broshur, ket saludsodenyo no kasanoyo a maipan ti kopia.
5 Iti sumaganad a pannakisarita iti telepono, mabalinyo a padasen ti kastoy a pangirugi iti panagadal:
◼ “Kayatko nga ituloy daydi nagsaritaanta ket ipakitak no asino ti makaibaga kadatayo iti panggep ti biag. [Isalaysayyo ti parapo 1 ken 2 iti panid 6 ti broshur a Panggep ti Biag.] Ilawlawag ti Apocalipsis 4:11 a ni Jehova a Dios ti Namarsua kadatayo. [Basaenyo.] Sigurado nga adda makagapu no apay a pinarsuanatayo. Dagiti tattao a mayat a mangammo iti dayta inadalda ti naisurat a Sao ti Dios, ti Biblia. Kayatko nga itukon kadakayo dayta nga oportunidad.” Ilawlawag no kasano ti pannakaidaulo ti libre a panagadaltayo iti Biblia iti pagtaengan ken iyurnos ti panangirugi iti panagadal.
6 Daytoy positibo nga iyaadani mabalin a liwliwaenna dagidiay natayan iti ipatpateg:
◼ “Mangar-aramidak iti serbisio publiko para kadagiti amin a natayan iti ipatpateg. Yantangay mabalin a daytoy ti maysa kadagiti karirigatan nga ibturan ti asinoman kadatayo, naisagana daytoy a broshur a No Adda Matay nga Ay-ayatenyo. Minilion a tattao ti natulongannan. Kayatko nga ipakita kadakayo ti kunana maipapan iti nakaay-ayat nga inkari ni Jesu-Kristo. [Basaenyo ti maikalima a parapo iti panid 26, a pakairamanan ti Juan 5:21, 28, 29.] Kitaenyo daytoy ladawan iti panid 29 a mangipakpakita iti salaysay ti Ebanghelio maipapan iti aktual a panangpagungar ni Jesus ken ni Lazaro. No kayatyo a basaen daytoy makaliwliwa a broshur, maragsakanak a mangibati iti daytoy kadakayo.”
7 Inton agsublikayo, mabalinyonto manen nga ipakita ti ladawan iti panid 29 ti broshur a “No Adda Matay nga Ay-ayatenyo” sa kunaenyo:
◼ “Lagipem ti nagsaritaanta maipapan iti panangpagungar ni Kristo ken ni Lazaro. [Basaem ti kapsion iti panid 28, ket usigenyo ti material iti sidong ti subtitulo nga “Agpayso Kadi a Napasamak?”] No magagaranka a mamati a makitamto manen ti natay a patpatgem, bay-am ta tulonganka a maaddaan iti pammati iti namnama a panagungar.” Itukon ti panagadal iti Biblia iti pagtaengan.
8 Sapay koma ta aramidentay ti amin a kabaelantayo kadagiti sumagsaganad a bulan tapno tuladentay ni Jesus babaen ti ‘panangliwliwa iti amin nga agdung-aw.’—Isa. 61:2.