Ti Ministeriotayo—Ebkas ti Pudno nga Ayat
1 Babaen iti ministeriotayo maipakitatay ti panagtulnogtayo iti dua a kadaklan a bilin. (Mat. 22:37-39) Ti ayattay ken Jehova tignayennatayo nga agsao a sipopositibo maipapan kenkuana. Ti ayattay kadagiti kaarrubatayo tignayennatay a mangparegta kadakuada a mangbirok iti pannakaammo maipapan iti pagayatan ken pangpanggep ti Dios tapno, kas kadatayo, mabalinda nga ayaten ni Jehova ken maikarida iti gunggona a biag nga agnanayon. No kasta, babaen iti ministeriotayo maidayawtay ti nagan ni Jehova ken maiburaytayo ti nagpateg a namnama iti Pagarian kadagiti kaarrubatayo. Wen, ti ministeriotayo ket ebkas ti pudno nga ayat iti Dios ken iti tao.
2 Ti ayattayo tignayennatay a makisarita iti amin a kita ti tattao ken iti amin a kasasaad. (1 Cor. 9:21-23) Kas panangyilustrar: Idi naglugan iti eroplano, nagtugaw ti Kristiano a panglakayen iti abay ti maysa a padi a Romano Katoliko. Nakisarita ti panglakayen iti padi babaen ti sumagmamano a nataktika a saludsod sa, kalpasanna, inturongna ti saritaan maipapan iti Pagarian. Idi bumaban ti padi iti eroplano, nangala iti dua a librotayo. Anian a nagsayaat a resulta gapu iti panangyebkas ti panglakayen iti pudno nga ayat iti kaarrubana!
3 Ti Ayat Tignayennatayo a Mangasaba: Dagidiay makiraman iti auxiliary ken amin-tiempo a panagpayunir talaga nga iyeb-ebkasda ti pudno nga ayat iti Dios ken iti kaarruba. Naynay nga isakripisio dagiti payunir ti tiempo ken pigsada a tumulong kadagiti sabsabali iti naespirituan. Aniat’ mangtigtignay kadakuada a mangaramid iti kastoy? Kinuna ti maysa a payunir: “Ammok a ti ayat ket bunga ti espiritu ti Dios. Gapuna no awan dayta diak koma naammuan ti kinapudno, ken saanak koma a payunir. Ayat ti makagapu no apay a maseknanak kadagiti tattao, a sipapanunotak kadagiti kasapulanda, ket ammok a matignay dagiti tattao gapu iti ayat.” Impakita ni Jesus ti kasta nga ayat kadagiti tattao. Iti naminsan, idi mapmapanda iti maysa a lugar a kaduana dagiti nabannog nga adalanna tapno ‘aginanada iti apagbiit,’ immun-una a nakasangpet sadiay ti adu a tattao. Aniat’ inaramid ni Jesus? Gapu ta “simnek ti asina kadakuada,” binay-anna pay laeng dagiti personal a kasapulanna tapno ‘isurona ida kadagiti adu a bambanag.’—Mar. 6:30-34.
4 Uray di kayat dagiti tattao ti naimbag a damag nga ituktukontayo, sagrapentay ti nauneg a rag-o, tangay ammotayo a gapu iti ayat, inaramidtay ti amin a kabaelantayo a tumulong iti pannakaisalakanda. Inton ukomennatayo amin ni Kristo iti kamaudiananna, maragsakantayto unay tangay impakitatayo ti pudno nga ayat babaen ti ‘naan-anay a panangitungpaltayo iti ministeriotayo.’—2 Tim. 4:5.