Dagiti Manangaywan a Mangidadaulo—Ti Mamangulo a Manangaywan
1 Nadagsen a responsabilidad ti agserbi kas manangaywan iti kongregasion. (Ara. 20:28; 1 Tim. 3:1) Daytoy ti umuna kadagiti serye dagiti artikulo a mangibalabala iti nadumaduma nga annongen dagiti Kristiano a panglakayen tapno maapresiartay amin ti napateg a trabaho nga ar-aramidenda nga agpaay kadatayo.
2 Dutokan ti Sosiedad ti mamangulo a manangaywan nga agserbi iti di nakedngan a tiempo. Bayat nga organisaren ti mamangulo a manangaywan dagiti bambanag, tumulong daytoy kadagiti panglakayen a mangasikaso a siuumiso kadagiti naituding nga annongenda. (Ti Ministeriotayo, panid 42) Ania ti ramanen daytoy?
3 Ti mamangulo a manangaywan ti umawat iti surat ti kongregasion ket itedna a dagus iti sekretario. Iti panagsagana para iti miting dagiti panglakayen, ammuen ti mamangulo a manangaywan ti singasing dagiti panglakayen kadagiti banag a masapul a pagsasaritaan sa mangaramid iti agenda. Isu met ti tserman iti miting dagiti panglakayen. Kadagiti panagdesision, siguraduenna nga umiso dagita. Imatonanna ti pannakaisagana ti Gimong iti Serbisio ken ti panangyeskediul kadagiti palawag publiko. Isu ti mangaprobar kadagiti amin a pakaammo iti kongregasion, mangautorisar iti pannakabayad amin a normal a paggastuan, ken siguraduenna a masukimat ti kuenta ti kongregasion iti kada tallo a bulan.
4 Kas tserman, organisaren ti mamangulo a manangaywan ti trabaho ti Congregation Service Committee. No kiddawen ti maysa nga agad-adal iti Biblia a kayatnan ti agbalin a di bautisado nga agibumbunannag wenno no ti di bautisado nga agibumbunannag ket kayatnan ti agpabautisar, iyurnos ti mamangulo a manangaywan ti pannakisarita kenkuana dagiti panglakayen. Idauluan met ti mamangulo a manangaywan ti panagsagana para iti ibibisita ti manangaywan ti sirkito tapno magunggonaan a naan-anay ti kongregasion iti naisangsangayan nga aktibidad iti dayta a lawas.
5 Adu ken nadumaduma ti annongen ti mamangulo a manangaywan. Bayat a sipapakumbaba nga asikasuenna dagiti rebbengenna “iti napudno a kinapasnek,” mabalintay amin nga aramiden ti pasettayo babaen ti pannakitinnulong kadagiti panglakayen. (Roma 12:8) No ‘natulnogtayo’ ken ‘agpasakop’ kadagidiay mangidadaulo kadatayo, naragragsak ti panangitungpalda iti trabahoda.—Heb. 13:17.