Sangalubongan a Panangselebrar iti Ipapatay ni Kristo
1 Adu a sagsagut ti imparabur ni Jehova kadatayo. Ti pakagupgopan ti kinaimbag ken naayat a kinamanangngaasina ket sibabatad a nadeskribir kas “di mailadawan nga awan bayadna a sagutna.” Wen, nakaskasdaaw unay ti “di kaikarian a kinamanangaasi ti Dios” ket ditay kabaelan a deskribiren dayta.—2 Cor. 9:14, 15.
2 Ti Kadaklan a Sagutna: Ti kadaklan kadagiti amin a sagutna isu ni Jesu-Kristo a Mannubbot ti Sangatauan. Inted ni Jehova ti dungdungnguen ken bugbugtong nga Anakna nga ebkas ti dakkel nga ayatna iti lubong ti sangatauan. (Juan 3:16) Maikari ti sangalubongan a pannakaselebrar ti kasta a di kaikarian a bendision ti Dios. Kaano ken kasano? Inton rabii ti Huebes, Abril 1, 1999, selebraranto dagiti Kristiano iti intero a lubong ti Pangrabii ti Apo, a rambakanda ti Pananglaglagip iti kadaklan kadagiti isuamin a sakripisio.—1 Cor. 11:20, 23-26.
3 Natay ni Kristo para kadatayo “bayat a managbasoltay pay laeng idi,” ket maipakitatayo ti personal a panagyamantayo babaen ti panangrambak iti Memorial ti ipapatayna ken panangawis kadagiti sabsabali tapno kaduatayo ida a tumabuno iti dayta a kapapatgan nga okasion.—Roma 5:8.
4 Ti Kapatgan a Pasken: Ti panangrambak iti ipapatay ni Kristo nangnangruna nga itampokna ti naan-anay a panangitandudona iti kinasoberano ti Dios. Ipalagipna met kadatayo a mabalintay a tagiragsaken ti nadalus a takder iti imatang ni Jehova babaen ti panangalagad ti pammati iti daton ni Jesus, iti kasta maipanamnama ti pannakaisalakantayo. (Ara. 4:12) Pudno unay, daytoy ti kapatgan a pasken iti intero a makatawen!
5 Maiparangarang ti panagayat kadagiti kaarrubatayo no awisentay ida a makipagrambak kadatayo iti Pangrabii ti Apo. Dagiti pagimbagan ti subbot ket mabalin pay laeng a gundawayan dagiti minilion a tattao a makaadal iti naringbaw a pategna. (Fil. 3:8) Magun-odan dagidiay mangal-alagad ti pammati iti daton ni Kristo ti natibker a namnama a biag nga agnanayon.—Juan 17:3.
6 Adda dagiti naisangsangayan a gundaway a maipakitatayo ti panangapresiar iti naidumduma a di kaikarian a kinamanangngaasi ti Dios no panawen ti Memorial. Nagsayaat a tiempo daytoy tapno makiramantayo a sireregta iti pannakaikasaba ti naimbag a damag ti Pagarian ti Dios. Agur-uray ti adu a gunggona kadagiti amin a sikakararag a mangutob iti di mailadawan a libre a sagut ni Jehova ket iyurnosda ti tumabuno iti pannakaselebrar ti Pangrabii ti Apo iti daytoy a tawen!