Addaankay Kadi iti Espiritu ti Panagsakripisio?
1 Kas panangapresiar iti panagsakripisio ni Jesu-Kristo para iti sangatauan, matignaytayo koma amin a mangisakripisio kadagiti abilidad, puersa, ken pigsatayo. Ipatigmaan ti Kasuratan: “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi.” (Roma 12:1) No regular a sukimatenyo ti bagiyo matulongannakayo a mangtarus no ipakpakitayo met laeng a naan-anay dayta a kita ti espiritu agingga iti ipalubos ti personal a kasasaadyo.
2 Iti Panagbirok ti Pannakaammo iti Biblia: Nangilasinkayo kadin iti tiempo para iti regular a panagbasa ken panagadal iti Biblia a personal? Sursurotenyo met laeng dayta nga eskediul? Adda kadi rutinayo nga agsagana a naimbag para kadagiti gimong ti kongregasion? No maysakayo nga ulo ti pamilia, adda kadi regular a panagadal iti Biblia ti sangakabbalayanyo? Tapno maaramid dagitoy, mabalin a kasapulan ti panangisakripisio iti tiempo a panagbuya iti telebision wenno panagkompiuter wenno dadduma pay a banag. Ngem anian a nagbassitan dayta a sakripisio yantangay ammoyo a ti tiempo a panagadal iti Sao ti Dios isunto ti mangitunda kadakayo iti biag nga agnanayon!—Juan 17:3.
3 Iti Panangsanay Kadagiti Annakyo: Ti kasayaatan a tiempo a panangirugi dagiti agtutubo a sursuruen ti panagsakripisio ket kabayatan ti kinaubing. Isuroyo kadagiti annakyo a nupay adda tiempo ti panagay-ayam, masapul nga adda met tiempo para iti trabaho ken teokratiko nga ar-aramid. (Efe. 6:4) Ikkanyo ida kadagiti makagunggona a trabaho iti pagtaengan. Mangyeskediul iti regular a panagkakaduayo a makiraman iti ministerio. Pasingkedanyo ti instruksionyo babaen ti mismo a nasayaat nga ehemployo.
4 Kadagiti Aktibidad ti Kongregasion: Rumang-ay ti kongregasion no situtulok nga agsakripisio ti tunggal maysa tapno maaramid dagiti banag a pagimbagan ti isuamin. (Heb. 13:16) Mabalinyo kadi ti mangipaay iti ad-adu pay a tiempo a mangikasaba iti Pagarian ken agaramid iti adalan? Makapagboluntariokayo kadi a tumulong kadagiti masakit wenno lallakay ken babbaket, a nalabit iluganyo ida a mapan kadagiti gimong?
5 Sakbay ti kamaudianan a panangisakripisiona iti natauan a biagna, binalakadan ni Jesus dagiti adalanna nga ipamaysada ti matada kadagiti interes ti Pagarian, a pagbalinenda a segundario amin a dadduma a bambanag iti biag. (Mat. 6:33) Ti kasta nga espiritu ti panagsakripisio ipaayannatayo iti dakdakkel a ragsak bayat nga itultuloytayo ti agserbi a sirarag-o ken Jehova.