Saludsod
◼ Kasano a mabadangan dagiti attendant dagiti nagannak a mangtulong kadagiti annakda a mangtaginayon iti kinaurnos kadagiti gimong?
Gagangay a nasaranta dagiti ubbing, dida naruam nga agtugtugaw iti mabayag. Kalpasan ti gimong, nakaurnongen dagiti ubbing iti pigsa ket kayatdan ti agtaray ken mangkamat kadagiti dadduma nga ubbing iti Kingdom Hall wenno iti dadduma pay a pagtataripnongan, iti pagiparadaan, wenno iti pagnaan. Nupay kasta, pudno ti kuna ti proverbio: ‘Ti anak a mabaybay-an ibabainna ti nagannak kenkuana.’—Prov. 29:15.
Nakalkaldaang, addada lallakay ken babbaket a kakabsattayo a nadangran unay gapu ta nadalapus ida dagiti ubbing ket natumbada. Daytoy ti nakaigapuan ti nakaro a panagsagaba ken dakkel a gastos dagiti nagannak ken ti kongregasion. Para iti mismo a pannakasalaknibda ken kinatalged dagiti sabsabali, saan koma a mapalubosan dagiti ubbing nga agtaraytaray ken agay-ayam iti uneg wenno ruar ti Kingdom Hall.
Addaan dagiti nagannak iti Nainkasuratan a responsabilidad a mangsanay kadagiti annakda a mangraem a siuumiso kadagiti lugar a pagdaydayawantayo. (Ecl. 5:1a) Kadagiti Nakristianuan a gimong, asamblea, ken kombensiontayo, matudingan dagiti attendant a mangkita nga “isuamin a bambanag maaramid koma a sitatakneng” ken adda koma ‘nasayaat nga urnos.’ (1 Cor. 14:40; Col. 2:5) Masapul a nasiputda a kanayon sakbay, kabayatan, ken kalpasan ti programa, agpadpada iti uneg ken ruar. No agtaraytaray wenno alikuteg ti ubing, mabalin a siaalumamay a pagtalnaen ti attendant, sa ilawlawagna iti ubing no apay a saan a nasayaat ti kasta nga ar-aramidenna. Siaanus met koma a maibaga iti nagannak ti ubing ti maipapan iti problema ken ti kinapateg ti panangaywan iti ubing. Agtignay koma a siuumiso dagiti nagannak.
Natural nga agsangit wenno agloko sagpaminsan dagiti maladaga ken babassit nga ubbing kabayatan ti gimong. Dagiti attendant a sumangpet iti 20 a minuto sakbay a mangrugi ti programa mabalinda nga ireserba dagiti makinlikud a pagtugawan para kadagiti nagannak a mayat nga agtugaw sadiay a kadua dagiti ubbingda. Makikooperartayo koma babaen ti panangireserbatayo kadagidiay a tugaw a para kadakuada.
No agloko ti maysa nga ubing, agtignay koma dagiti nagannak. No baybay-an dagiti nagannak ket makaisturbo unayen dayta, siaanus koma a kiddawen ti attendant no mabalin dagiti nagannak nga iruar ti ubing. No awisentayo a makigimong dagiti kabbaro nga addaan kadagiti ubbing, katugawtayo koma ida ket tulongantayo a mangasikaso kadagiti ubbing no agsangit wenno aglokoda.
Agrag-otayo a makakita kadagiti ubbing a nagduduma ti edadda iti Kingdom Hall ken makaimatang iti nasayaat a konduktada iti uneg ti sangakabbalayan ti Dios. (1 Tim. 3:15) Babaen ti panangraemda iti urnos ni Jehova iti panagdayaw, maipaayda kenkuana ti dayaw ken apresiaren ida ti intero a kongregasion.